ЦIийи автобусри кIвалахда
Йисан эхирдалди Дагъустанда кардик кутадай цIийи автобусри гзафни-гзаф яшайишдин жигьетдай метлеб авай маршрутра кIвалахда. И улакьар чпин сагъламвал сергьятламиш тир агьалийрин игьтияжрив кьадайвал туькIуьрнава.
Къейдзавайвал, и серенжем кьиле тухунихъ республика патал кьетIен важиблувал ава, вучиз лагьайтIа, статистикади къалурзавайвал, уьлкведа виридалайни «яшлу» автобусар анжах Дагъустанда кардик ква. И жигьетдай кIвалах кьиле тухунин кар гележегдани давамарда.
ХъуьтIуьз гьазурзава
ФКУ Упрдор «Кавказди» СКФО-дин федеральный рекьер 2023-2024-йисарин хъуьтIуьн вахтуниз гьазурунин кIвалах 1-ноябрдиз акьалтIарда. Идакай Управленидин пресс-къуллугъди хабар гузва.
Къейдзавайвал, рекьерин хатасузвал гьавадин мишекъат шартIарин таъсирдик кваз арадал къведай хаталувилерикай хуьн патал са жерге серенжемар кьиле тухузва. И серенжемда санлай къачурла 525 рекьерин техника кардик кутунва.
Етим аялриз – кIвалер
2023-йисуз Дагъустанда сифте яз етим аялриз (23 йис тамам хьанвай) «кIвалерин сертификат» (жилищный сертификат) гунин алава тир куьмекдин серенжем уьмуьрдиз кечирмишзава. И кIвалах диде-бубайрикай магьрум хьанвай ва чеб яшайишдин шартIар хъсанаруниз муьгьтеж тир ксариз куьмек ва пулдин такьатар гун патал кьиле тухузва. Идакай, РД-дин эцигунрин, архитектурадин ва ЖКХ-дин министерстводин пресс-къуллугъдал асаслу яз, РИА «Дагъустан» изданиди хабар гузва.
Алай йисуз и макьсадриз Дагъустандин Гьукуматди чара авунвай такьатрихъ 2 334 585 манатдин сертификатар гуз хьанва.
И серенжемдин артуханвал ам я хьи, кIвал вич ва ам къачудай чка хкягъун администрациядилай ваъ, маса къачузвай ксарилай чпелай аслу я. Сертификатдин счетдал алай такьатрал хсуси пулни эхцигна, жуваз хуш тир кIвал къачудай мумкинвални ава.
Эцигунрин ведомстводи гъавурда турвал, арзаяр кьабулунин кар цIинин августдиз малумарнай.
Гьа са вахтунда лазим тир документрин сиягь лап куьруьди тир, арзаяр кьабулунихъ галаз сад хьиз, абур ахтармишни ийизвай, герек арзайрин гьакъиндай тади гьалда тайин къарар кьабулдайвал.
Хабар гузвайвал, сентябрдин вацра сифтегьан 189 агьалиди чпин сертификатар вахчунва ва кIвал къачун патал документар кIватIиз эгечIнава.
Министерстводин делилралди, алай вахтунда сертификатрин сагьиб хьанвай 56 касди пулдин такьатар къачун патал документар вуганва, им лагьай чIал я хьи, абуруз чпиз хуш тир квартира ва я тахьайтIа кIвал жагъанва. ИкI, 40 касдиз пулар рекье тунва, и карди абуру кIвалер къачунвайди тестикьарзава.
Чешмеди мисал гъизвайвал, гьа икI са шумуд йисалай мурад кьилиз акъатай дагъустанвийрикай сад Асият Якупова я. Хабар гузвайвал, диде-буба амачир и етим руша муниципалитетдивай квартира къачун вилив хуьз 20 йис тир. Амма гила «кIвалин сертификат» себеб хьана адалай Семендер поселокда кIвал къачуз алакьнава. Асията хиве кьазвайвал, мурад кьилиз акъудун патал ада сертификатдин такьатрал хсуси пулни эциг хъувуна.
РД-дин эцигунардай министерстводи къейд ийизвайвал, ихьтин алава куьмекар гун Дагъустандин етим аялрин яшайиш патал еке метлеб авай кар я. И серенжемди абур хсуси кIвалералди таъминардай мумкинвал арадал гъизва.
1,7 млрд манатдин проект
Дагъустанди 2024-йисуз мелиорациядин серенжемриз талукь тир 1,7 миллиард манатдин проект уьмуьрдиз кечирмишун пландик кутунва. Идакай, РД-дин хуьруьн майишатдин ва недай суьрсетдин министерстводал асаслу яз, РБК-ди хабар гузва.
ИкI, республикади уьлкведин хуьруьн майишатдин ведомстводиз ятар гунин (орошение) ва цIийи чилер кардик кутунин 117 проект къалурнава.
Чешмеди кхьизвайвал, 2023-йисуз республикада мелиорациядин хиле 840 миллион манатдин къимет авай 56 проект уьмуьрдиз кечирмишнай.
Идалайни алава яз, эхиримжи пуд йисуз регионди 2 миллиард манатдин къимет авай мелиорациядин проектар кьилиз акъудна, и серенжемрин куьмекдалди регионда 25 агъзур гектардикай ибарат майданар хуьруьн майишатда кардик кутунал хкана ва маса серенжемар кьилиз акъудна.
Сад лагьай гими
Дагъустандини Туьркменистанди и кьве региондин арада пар чIугвадай сад лагьай гими кардик кутунин месэла веревирд ийизва. Идакай, «Махачкъаладин гьуьлуьн алишверишдин порт» АО-дал асаслу яз, «Дагъустандин экономика» телеграм-каналди хабар гузва.
Портунин векилдин делилралди, и кIвалах кардик кутуналди Туьркменбаши шегьердин портунихъ галаз гьам алишверишдин, гьамни экономикадин жигьетдай алакъа арадал гъиз жеда. Адан гафаралди, и кIвалах 2023-йисан эхирдалди кьилиз акъудун фикирдиз къачунва. Алай вахтунда Туьркменистандин патай и кардиз талукь тир делилар вилив хуьзва.
Гьа са вахтунда портуна къейд авурвал, эхиримжи сеферда Туьркменбашидинни Махачкъаладин арада гимийрин алакъа 2011-2012-йисара кардик хьанай.
Гьазурайди — Муса Агьмедов
