Дагъустандиз республикадин колледжра устIарханаяр (мастерская) арадал гъун патал милли “Образование” проектдин сергьятра аваз 200 миллион манат пул чара ийида. Идакай ТАСС-ди хабар гузва.
Чешмедин делилралди, и такьатрихъ кьуд йисан къене алай аямдин 41 устIархана арадал гъидайвал я.
РД-дин гьукуматдин пресс-къуллугъди хабар гузвайвал, эхиримжи йисара Дагъустанда инженерно-технический хиле пешекаррин кьитвал гзаф хьанва. Идалай гъейри, пешекаррин игьтияж промышленностдин, эцигунрин, ЖКХ-дин, хуьруьн майишатдин, транспортдин ва рекьерин майишатдин, энергетикадин, алакъадин, медицинадин хилерани ава.
Къейд ийин хьи, милли “Образование” проект 2019-йисуз кардик кутунай ва адан сергьятра аваз тамамарзавай кIвалахар 2024-йисалди давам жеда. Адан умуми бюджетди, санлай къачурла, 784, 5 млрд манат тешкилда. Проектдин кьилин макьсадрикай сад Урусатда умуми образованидин ери хъсанарун я.
Чи мухбир
