Сулейман-Стальский райондин Сардархуьре Ватандин ЧIехи дяведин активный иштиракчи, гзаф шабагьрин сагьиб Азим Алимов рикIел хуьнин лишан яз, жаванрин арада Дагъустан Республикадин кIвенкIвечивал патал дзюдодай гьар йисуз тухузвай акъажунар кьиле фена. «Сардар» спорткомплексдин гегьенш залда кьиле тухвай турнирда Махачкъала, Хасавюрт, Каспийск, Къизляр, Буйнакск, Дербент шегьеррай, Сулейман-Стальский, Хив, Тлярата, Агъул, Мегьарамдхуьруьн, Шамил, Кьурагь районрай ва Дербент райондин Чинар хуьряй атанвай командайри иштиракна. Спортсменрин кьадар 100-далай виниз тир.

Мярекат райондин администрациядин кьилин 1-заместитель Лацис Оружева ачухна. Ада райондин кьил Нариман Абдулмуталибован, депутатрин собранидин председатель Штибег Мегьамедханован ва вичин патай турнирдин иштиракчийриз тебрикдин келимаяр лагьана.Турнир ачухуниз талукь мярекатдал гьакIни тебрикдин келимаяр Азим Алимован гада, зегьметдин ветеран Аким Алимова, спортдин лайихлу мастер, дуьньядин чемпион Руслан Гьамзатова, райондин образованидин управленидин начальник Гьуьсейн Шихбабаева, акъажунрин кьилин судья, пешекаррин арада дзюдодай дуьньядин чемпион Тельман Къурбанова лагьана. Районда кардик квай аялрин яратмишунрин кIвалин фольклордин коллективди (регьбер — Индира Рашидова) зиринг “Лезгинка” кьуьл тамамарайдалай гуьгъуьниз майдандиз жаван спортсменар экъечIна. Къизгъиндаказ кьиле фейи акъажунра 1-чка Сулейман-Стальский райондин командади кьуна. 2 ва 3-чкайриз Дербент ва Къизилюрт шегьеррин командаяр лайихлу хьана. Тафаватлу хьайи командайриз ва кьилдин спортсменриз кубокар, медалар, пулдин пишкешар гана.

Хазран  Кьасумов