1-октябрдилай 9-октябрдалди чи республикада Вирироссиядин «Урусрин сегьне» 8-фестиваль кьиле фида. Адан сергьятра аваз Махачкъалада М. Горькийдин тIварунихъ галай Урусрин госмуздрамтеатрда ва А.-П. Салаватован тIварунихъ галай Къумукьрин театрда тамашаяр къалурда. Билетар «Пушкинан картадайни» къачуз жеда.
Фестивалдиз талукьарна, ам башламишдалди са шумуд югъ амаз, Дагъустандин культурадин министрдин заместитель, статс-секретарь Мурад Гьажиеван, М. Горькийдин тIварунихъ галай Урусрин госмуздрамтеатрдин директор Тимур Мегьамедован, театрдин кьилин режиссёр Скандарбег Тулпарован иштираквал аваз кьиле фейи пресс-конференциядал къейд авурвал, Дагъларин уьлкведиз Россиядин шегьеррай, гьа гьисабдай яз Москвадай, Санкт-Петербургдай, Пермдай, Иркутскдай, Назрандай, Саратовдай, гьакIни къунши Азербайжан (Бакудин театр) ва Къазахстан (Карагандадин театр) республикайрай сегьнедин устадар нубатдин сеферда мугьман хьанва. Фестивалдин сергьятра аваз, алай йисуз 100 йисан юбилей къейдзавай М. Горькийдин тIварунихъ галай госмуздрамтеатрдин коллективди Дагъустандин халкьдин шаир Расул Гьамзатован «Остров женщин» эсердин бинедаллаз РФ-дин искусствойрин лайихлу деятель Скандарбег Тулпарова эцигнавай тамаша къалурда.
Фестиваль ачухуниз талукьарнавай шад мярекатдал мугьманар Дагъустандин Кьил Сергей Меликован тIварунихъай РД-дин культурадин министр Зарема Бутаевади тебрикна. Ада «Урусрин сегьне» фестивалдин сергьятар къвердавай гегьенш жезвайди къейд авунихъ галаз сад хьиз, культурадин уьмуьрда лишанлу и вакъиа Дагъустандин сегьнедин искусстводин халис флагман тир М. Горькийдин тIварунихъ галай госмуздрамтеатрдин 100 йисан юбилейдин сергьятра аваз кьиле тухунихъ чун патал мадни еке важиблувал авайдакай лагьана.
— Ихьтин фестивалди чаз сифте нубатда Россиядин жуьреба-жуьре регионрин, дуьньядин маса уьлквейрин искусстводихъ галаз таниш жедай, абурун тежриба чирдай, гьа са вахтунда Урусрин чи театрдизни вичикай уьлкведин медениятдин майданра хабар гудай мумкинвал гузва. Гьар са тамаша къалурайдалай кьулухъ ам сегьнедин устадри веревирдда. Им тежриба хкажун патал лап хъсан къайда я, — къейдна министрди.
Фестиваль Мария Ермоловадин тIварунихъ галай театрди (Москва) Владимир Набокован романдай эцигнавай «Приглашение на казнь» тамашадалди (режиссёр-постановщик — Марина Брусникина) ачухна.
РикIел хкин: Ватандин ЧIехи дяведин йисара Урусрин драмтеатрдин куьгьне дараматда Ермоловадин театрди тамашаяр къалурнай.
Рагнеда Рамалданова
