29-сентябрдиз Ахцегьа «Леки» фондуни азаддаказ кьуршахар кьунай 2009-2014-йисара хайи жаванрин арада турнир кьиле тухвана. Аниз Кьиблепатан Дагъустандин саки вири районрай, гьакIни Каспийск, Дербент, Дагъустандин Огни, Избербаш, Хасавюрт, Къизляр шегьеррай, Дахадаев, Къайтагъ, Сергокъала, Къаякент, БотIлих район­рай 300-далай виниз спорт­­сменар атанвай. Абу­ру­ яшарин 3 (2009-2010, 2011-2012, 2013-2014) ва заланвилин 23 категория­дай гьасиррал чпин ус­тад­вал къалурна. Гъалибвал къазанмишай ва приздин чкаяр кьур вири спортсменриз турнирдин спонсоррин ва «Леки» фондунин патай талукь дережайрин медалар, дипломар ва пишкешар гана.

Спортдин мярекатдин макьсад азаддаказ кьуршахар кьун раиж, машгьур  авун, жаванринни аялрин устадвал ва тежриба хкажун, республикадин жуьреба-жуьре районрай тир спортсменрин арада дуствилин  алакъаяр мадни мягькемарун тир.

«Леки» фондунин коллективди турнир тешкилуник пай кутур спонсорриз сагърай лугьузва. Абурун арада ава: транспортдин «ТЕСАР», «Шумтрансавто» компанияр, Гудым Диана Мугьидулагьовна, компанийрин «РИАН» десте, электроникадин «AppleYug» туьквен, алишверишдин «Славица» ва «Райфрут» компанияр, эцигунардай материалар акъудзавай «FARDO», эцигунардай материалар маса гудай «Араба», «Оптоцен» сетар ва масабур. «Леки» фондунин коллективди  спортдин серенжем тешкилунин карда куьмекар гунай Ахцегь райондин адми­нис­трациядин «Физический культурадин ва спортдин отдел» МКУ-дин коллективдин, гьакIни акъажунрин судьяйрин ва тренеррин тIварунихъни разивилин келимаяр лугьузва. Турнир гьар йисуз кьиле тухунин ва ам мадни машгьур хьунин умудлувал къалурзава.

РикIел хкин: «Леки» фонд уьлкведа ва адалай яргъарани яшамиш жезвай чи ватанэгьлийрин итижлу проектрин тереф хуьз, абур кьилиз акъудуник пай кутаз ва куьмекар гуз гьазур ачух майдан я.

Рагнеда Рамалданова