«Халкьдин культура хкаж тавунмаз, амай кIвалахарни вилик тухуз жедач», — лагьанай Абдуллагь Искендерова. И жигьетдай культурадин хилен работникрин хивени еке везифаяр ава.

Инсанрин культура хкажунин жигьетдай ЦIийи Испикрин хуьруьн клубдин заве­дующий Перихалум Къазанбеговади­ ва анин кружокрин кIвалахрин руководитель Галина Ризаевади  еке кIвалах тухузва. И кардихъ зун, чкадал фена, клубдин кIвалах ахтармишайла ва хуьруьнвийрихъ галаз ихтилатар авурла инанмиш ­хьана.

Клубдиз фейила, ана авай михьивили, экуь­вили, чешнелу къайдади, цларал алай стендри, плакатри ва аквадай агитациядин маса такьатри чпел фикир желбзава. Са шумудан тIвар кьан. «Испикри абурал дамахзава», «Абуру Ватан патал чанар гана», «Абуру­ Ватан хвена», «Чи хуьруьнвияр — дяведин мах­сус серенжемдин иштиракчияр», «Чун тер­рордиз акси я», «Чи машгьур хуьруьнвияр»…­

ИкI, гуьрчег къайдада клуб безетмишун ва тадаракламишун — им, гьелбетда, чпин пешедал рикI алай ва кIвалахдин гзаф йисарин тежриба авай культработникар тир Перихалум Къазанбеговадин ва Галина Ризаевадин зегьметдин нетижа я.

Культпросветучилище акьалтIарайда­лай­ гуьгъуьниз П. Къазанбеговади испиквийриз культурадин жигьетдай къуллугъ ийиз 44 йис я. Бажарагълу культработник хьиз, Перихалум кьетIен сес авай манидар, «КьепIинин кьилихъ дидедин лайлаяр», «Яран суварин лирли», «Гуни», «Пешапай» ва маса сегьнеяр устаддаказ къалурзавай гьевескар артистни я.

П. Къазанбеговади райондин культурадин­ дараматдин патав гвай фольклордин «Куьре» ансамблдин кIвалахдани активвилелди иштиракзава, ада хуьруьн культурадинни ял ягъунин центрадизни (КДЦ) регьбервал гузва.

Хуьре  культура вилик тухуник еке пай кутунай ва районда кьиле тухузвай культурадинни шадвилин мярекатра активвилелди иштиракунай П. Къазанбеговадиз райондин кьилин чухсагъулдин чар ганва. Адахъ дипломар ва грамотаярни ава.

Клубда кружокрин кIвалах кьиле тухузвай Галина Ризаевади хуьруьнвийриз къуллугъ ийиз 24 йис я. Алай вахтунда клубда 4 кружок кардик ква. Абурун кIвалахда хуьруьн жегьилри активвилелди иштиракзава. Идалайни гъейри, кружокрин членри районда кьиле тухузвай конкурсрани иштиракзава, приздин чкаяр кьазва.

Перихалум Къазанбеговади ва Галина Ризаевади клубда гьар жуьредин мярекатар кьиле тухузва, лишанлу ва суваррин йикъар къейдзава.

ИкI, клубда СВО-дин иштиракчи Марсель Ризаевахъ галаз гуьруьш тешкилна. Ам рикIел аламукьдайди, ватенпересвилин гьиссер кутадайди хьана. Тамам тушир мобилизациядик кваз, СВО-дин зонадиз фейи, алай вахтунда ана мотострелковый батальондин гьужумдин ротадин командирдин заместитель яз къуллугъзавай Марсель Галина Ризаевадин хва я. СВО-дин аскер, гьакIни шаир ва журналист хва тербияламишунайни Г. Ризаевадиз хуьруьнвийри сагърай лугьузва.

Клуб испиквийрин рикI алай макандиз элкъвенва, ина гьамиша инсанар жезва.

— Перихалум Къазанбегова ва Галина Ризаева хьтин культработникар гьар са хуьруьн дамах я, — лагьана чаз хуьруьн кьил Рагиф Агьмедова.

Хазран  Кьасумов