Алай йисан 38-нумрадиз зи дахдин уьмуьрдикай, рикIел хкунрикай  На­риман Ибрагьимова кхьей макъа­ла кIелайла, чаз уьмуьрда бубади­ гайи тарсарикай, гьакIни кьилел атай  агьва­латрикай  зазни алаваяр хъийиз­ кIан хъана…

Гьар жуьмя юкъуз  чи хизанар санал кIватI жедай. Идаз чна хизандин­  ачух тарс лугьудай. Эмеяр, езнеяр­ къведай. Хъсан хуьрекни гьазурна, дидеди абур вилив хуьдай. Чазни пара шад жедай. «Чан балаяр, гьуьр­мет авай чкада къизилар, гимишар са шейэрни туш. Гьуьрмет авай чкада­ бахтни жеда, берекатни. ЧIехиди алай чкадал  жув тухудай тегьер чир хьухь.  ЧIехидаз — гьуьрмет, гъвечIидаз — куьмек», — насигьатар гудай дахди чаз.

«Ризкьидиз тикъет ямир. Фу суф­радин берекат я. Ам чилел вегье­мир.. КIвализ мугьман атайла, са чIавузни чин чIурмир, мугьман кIвалин берекат я. Айгьана мугьмандивай са багьа къаб хайитIа, жуваз хъел атанвайди адаз чирмир. Адаз валайни  гзаф фикир жезвайди я», — эзбердай дахди.

Зун Махачкъалада жуван хизандихъ галаз яшамиш жезвай. Хуьряй вуж къвез хьайитIани, дахди зи адрес вугудай, герек хьайитIа, жуван­ кIвализ хьиз алад лугьудай. Хуьряй­ атана, больницада къаткайди­ хьайи­тIа, гьадал кьин чIугунизни мажбурдай. Чна дахдин теклифар кьилизни акъуддай.

Хуьре чи хизан лап екеди тир. Вири санал яшамиш жезвай. Дах садрани девлетрихъ, еке пуларихъ калту­гайди туш. «Чан балаяр, я ви­ликни­­ фимир, я гуьгъуьнани акъвазмир, юкь­­ва аваз вач», — лугьудай рагьметлуда.

Хуьре  гзафбурун мехъеррик дахдикай шагь жедай. Са сеферда ме­хъе­рик кьве итим еке къалриз акъатна. Абур садавайни секинариз жезвачир. «Вининай Мирзяли дах къвезва!» — гьарайна сада. КикIизвайбур гьасятда секин хьанай…

Мехъеррикай. Кьуьлердайла, ди­шегьлийрин гъилера пулар твадай адетни гьа вахтара чи дахди хкудайди тир. Гила мад акат хъувунва. «Куьне кьуьл ийидайла, халуйри жибинда гъил тваз хьайитIа, гьасятда хкечI», — лугьудай чазни. Бязи дишегьлияр, кьуьлзавай кас виле такваз, адан кьуьлуьник фидачир. Ахьтинбуруз килигмир, фена, кьуьл ая кесибрихъ галазни», — тагькимардай дахди.

Зун хуьруьз жуван мукьва касдин мехъерик хъфена. Акуна хьи заз, са арадилай жегьилар къерехдиз янава. Куьн вучиз къерех хьанва лагьана хабар кьуна за. Жаваб: «Чи жибинар ичIи хьанва, хала, пулар гумач».

Дерди аваз, дах Дербентдиз фена. Дар вахтар тир. Вокзалдик са аялди адавай пул тIалабна. Вичив пул гвачирвиляй ада а аялдиз чантада авай тIунутIдикай ганай.

Хейлин йисар алатайла, Дербентда ам дахдал гьалт хъувуна. Са  жегьил патав атана, салам гана, ада дахдивай жузун-качузун авуна. Ахпа ресторандиз теклифна. Жегьилдин фи­кир вуч ятIа чин тийизвай дахди, сагърай, чан хва, герек авач лагьана. Амма жегьилди ам гужуналди тухвана, официантдиз хуьрекар гъун буйругъна ва дахдин рикIел, пул гвачиз, вичиз тIунутI гайиди хкана. Хъсанвал рикIелай алуд тийидай инсанар чи арайра тIимил авач..

Хъсанвили, регьимлувили, мергьяматлувили гьатта гьайванни кваз чIа­лал гъида. РакIарал къвез, акъваз­ тийиз, каци гьарайзава. Гьикьван квахь, гьайван, лагьайтIани, сакIани алатзавачир. Эхирни чара хьанач, дах къарагъна. Кац вилик экечIна, вич къвезватIа акваз, кьулухъ вил ягъиз-ягъиз, къавал хкаж хьаналда­. КилигайтIа, — турбада адан бицIи шен­­пIи акIанвай кьван! Дахди ам акъуд­ хъувурла, кац гзаф гагьди, чухса­гъул лугьузвайди хьиз, вичин­ чиниз килигиз акъвазналдай… Гьахь­тин къени, мергьяматлу кас тир рагьметлуди.

Майрам  Магьамдалиева