СтIал Сулейманан райондин Зугьрабахуьряй тир Юнусоврикай — Россиядин Федерациядин къайдаяр хуьдай органра намуслудаказ  къуллугъ авунин жигьетдай чешне тир бубадикайни  адан пуд хцикай — за делилар интернетдин куь­мекдалди жагъурна. Буба Юнусов Абдулжабар Агъабалаевич — полковник, юридический илимрин доктор, рухваяр Муслим — полковник, юридический илимрин кандидат, Эмзари  — полковник, юридический илимрин кандидат, Самур — майор, юридический илимрин кан­дидат.

Абдулжабар Юнусов 1949-йисан­ 20-декабрдиз Зугьрабахуьре 10 аял авай лежбердин хизанда дидедиз хьана. Адан буба Ватандин ЧIехи дяведа кьиляй-кьилди хьанвай кас тир. Гьавиляй Абдулжабараз зегьметдин дадни фад, гьеле 7 йисан яшда авайла, чир хьана. 8-класс куьтягьайла, ам Сергокъаладин педучилищедик экечI­на. 1968-йисуз анаг акьалтIарна, са тIимил вахтунда сифтегьан классрин муаллимвиле кIвалахай адаз армиядин жергейриз эвер гана. 1969-1971-йисара СССР-дин ВМФ-да (Севастополь шегьерда) вичин буржи кьилиз акъудна, Туьркменистандин ва Узбекис­тандин нафтIадин мяденра кIвалахна.

1973-йисуз А.А. Юнусов СССР-дин МВД-дин Ташкентдин высший школадин юри­дический факультетдин отделенидик экечIна. 1977-йисуз анаг «Уголовный розыск» пешедай акьалтIарна. 1982-йисуз — Москвада СССР-дин МВД-дин Академия. Гуьгъуьнлай Абдулжабар Агъабалаевича­ СССР-дин МВД-дин ва Узбекистандин МВД-дин органра жавабдар къуллугъар тамамарна. Афгъанистанда дяведин гьерекатар кьиле физвай вахтунда ада СССР-дин МВД-дин тапшуругъар кьилиз акъудна.

1990-йисалай 1997-йисалди кьегьал лезги хци Узбекистандин МВД-дин высший­ школада государстводинни праводин дисциплинайрин кафедрадин преподаватель, старший преподаватель, 1997-йисалай 2000-йисалди Россиядин МВД-дин Челябинскдин юридический институтда кафед­радин доцент яз кIвалахна.

2000-йисан майдиз Абдулжабар Юнусов Челябинскдин юридический институтдин государстводинни праводин кафедрадин начальниквиле тайинарна.

Гьа са вахтунда ам илимдин кIвалах­дал­ни машгъул хьана. ИкI, 1996-йисуз­ чи ватанэгьлиди («Организационно-право­вые основы деятельности милиции Узбекис­тана­ по борьбе с преступностью» темадай) юридический илимрин кандидатвилин, 2006-йисуз («Общетеоретические проб­лемы обеспечения прав человека в сов­ременной  России» темадай) юридичес­кий илимрин докторвилин диссертацияр­ агалкьунралди­ хвена. Адан гъиликай­ 6 монография, кIе­лунин 8 пособие ва кIе­лу­нинни методикадин 35-далай виниз кIва­лахар хкатна.

А. Юнусова къайдаяр хуьдай органра 50 йисалай виниз намуслудаказ кIвалахна. Къуллугъда агалкьунрай Абдулжабар Агъабалаевичаз 1, 2 ва 3-дережайрин «За безупречную службу», «200 лет МВД России», «За доблесть в службе», «За смелость» (Узбекистан) медалар, РФ-дин къенепатан крарин министерстводин грамотаяр ва маса шабагьар гана.

Абдулжабар Юнусовакай ва адан хизандикай макъала гьазурдайла, зун гзаф чешмейра къекъвена, хейлин инсанрихъ галаз ихтилатар авуна. Заз Абдулжабар Агъабалаевич рагьметдиз фенвайди къалурзавай чешме акунач. Амма чпихъ инанмишвал ийиз жедай са шумуд касди лагьайвал, А.А. Юнусов рагьметдиз фенва. Вичиз женнет кьисмет хьурай.

Абдулжабар Агъабалаевичан чIехи хва Муслим 1979-йисуз Узбекистанда дидедиз хьана. Ташкент шегьерда Суворован училище акьалтIарна, къенепатан крарин органра кIвалахдин рехъ башламишзава. Гьа са вахтунда Узбекистандин МВД-дин Академиядикни экечIзава. 1997-йисуз Россиядин МВД-дин Челябинскдин юридический институтдиз хтана, 2000-йисуз анаг акьалтIарна. Гьа йисуз адакай Южно-Уральский УВД-дин транспортдин Челябинскдин станциядин ЛОВД-дин силисдин отделдин силисчи хьана.

2010-йисуз Муслим Юнусова РФ-дин Президентдин патав гвай Россиядин халкьдин майишатдин ва государстводин­ къуллугъдин академиядин экономикадин­ факультетни акьалтIарна. 2002-йисалай ада РФ-дин МВД-дин Челябинскдин юридический институтда гражданвилинни праводин кафедрада преподаватель яз кIва­лахна. 2008-йисалай инихъ ам Россиядин ФСИН-дин Академияда гражданвилинни праводин ва процессрин кафедрадин доцент я.

Полковник М. Юнусов илимдинни­ ахтармишунрин кIвалахдални машгъул жез­ва. Ам 100-далай виниз илимдин ма­къалай­рин, 4 монографиядин, кIелунин 15 посо­бидин ва кIелунинни методикадин 30-далай виниз разработкайрин автор я. 2006-йисуз ада («Реализация человеком и гражданином в Российской Федерации конституционных обязанностей как важнейшее условие законности (теоретико-правовое ис­следование)» темадай) диссертация хвена, юридический илимрин кандидатвилин тIвар къачуна. Алай вахтунда ам («Обязанности как основание права» темадай) юридический илимрин докторвилин диссертация хуьн патал ахтармишунрин кIвалахдал машгъул я.

М. Юнусовахъ Россиядин юстициядин министерстводин грамота, «За безупречную службу» 1, 2 ва 3-дережайрин медалар ва маса шабагьар ава.

Кьвед лагьай хва Эмзари 1982-йисуз Узбекистанда дидедиз хьана. Ада юкьван школа Челябинскда акьалтIарна. 1999-йисан августдилай къенепатан крарин ва уго­ловно-исполнительный къурулушда къул­­лугъна. 2003-йисуз Э. Юнусова Россия­дин МВД-дин Челябинскдин юридический институт акьалтIарна, Южно-Уральскдин транспортдин УБД-да экономикадин хилен тахсиркарвилерихъ галаз женг чIугунин отделда оперуполномоченный яз кIвалахдал акъвазна. 2004-йисуз Москвада Россиядин МВД-дин управленидин Академиядин адъюнктурадик экечIна. 2008-йисан декабрдиз чи ватанэгьлиди («Правовые обязаннос­ти человека и гражданина  (вопросы теории)» темадай) диссертация хвена, юридический илимрин кандидатвилин тIвар къачуна. 2009-2019-йисара ада РФ-дин ФСИН-дин Академиядин  юридический факультетда государстводин ва праводин, международный ва Европадин праводин кафедрадин доцент яз кIвалахна. 2019-йисалай ам Москвада ФСИН-дин НИИ-да отделдин начальник я.

Эмзари Абдулжабаровичахъ илимдин 6-далай виниз публикацияр, 3 монография, кIелунин 12 пособие ва кIелунинни методикадин 32 кIвалах ава. Алай вахтунда ада («Правовые обязанности субъектов права как межотраслевой институт права» темадай) докторвилин диссертациядин винел кIвалахзава.

Гьукуматдин шабагьрин, лайихлу тIва­рарин сагьиб хьиз, Эмзари Юнусов спортдин гимнастикадай спортдин мастер, Узбекистандин ва Азиядин чемпионни я.

Пуд лагьай хва Самур 1988-йисуз Ташкентда дидедиз хьана. Юкьван школа ада Челябинскда акьалтIарна. 2005-йисуз ам гьана Россиядин МВД-дин юриди­ческий институтдик экечIна. 2008-йисуз ам Рязань шегьердиз фена, 2010-йисуз ана Россиядин ФСИН-дин Академия акьалтIарна. 2010-2013-йисара Россиядин­ ФСИН-дин Академиядин адъюнктурада кIелунар давамарна. 2014-йисан 18-декабрдиз ада («Принцип справедливости в уголовно-исполнительном праве: вопросы­ теории» темадай) диссертация хвена, юридический илимрин кандидатвилин тIвар къачуна.

2015-йисуз Самур Абдулжабаровича­ Москвадин экономикадин ва праводин Ака­демиядин экономикадин факультетни акьалтIарна.

2013-йисан октябрдилай 2015-йисан­ июлдалди ада Россиядин ФСИН-дин Академияда юридический факультет­дин пре­подавателвиле-методиствиле, 2015-йи­са­лай­­ 2020-йисалди Россиядин ФСИН-дин Академияда юридический факультетдин ад­министративный ва финансрин праводин кафедрадин преподавателвиле кIва­лахна. 2020-йисалай инихъ ам Россиядин ФСИН-дин НИИ-дин илимрин къуллугъчи я. Алай вахтунда Самур Абдулжабаровича («Справедливость — общеправо­вой принцип права» темадай) юридичес­кий илимрин докторвилин диссертациядал кIвалахзава. Ам 3 монографиядин, кIелунин 9 пособидин, илимдинни методикадин 18 материалдин, илимдин 80-далай виниз макъалайрин автор я.

ЧIехи Урусатдин гегьенш майданра чи лезги халкьдин векилар гзаф ава, гьам машгьур алимар, гьам жуьреба-жуьре рекьерай устад пешекарар яз. Абуру, чирвилералди, чпин къенивилелди, хиве авай везифаяр гьакъисагъвилелди тамамаруналди, виринра лайихлу гьуьрмет, авторитет къазанмишнава.

Ингье и баркаллу хизандикайни делилар майдандиз акъудуналди, чаз чи халкьдихъ гьихьтин кьегьал рухваяр аватIа къалуриз, абурун гьунарар раиж ийиз кIанзава. Къуй чеб авай чкайра сагъ-саламат хьурай! Чна абуралди гьахълудаказ дамах­зава.

Хазран Кьасумов