Уьмуьрдихъ пара кьетIен­вилер ава. Накь зун жегьил руш, свас тир. Къе зун аялрин диде, хтулрин баде я. Уьмуьрдин юлдашдихъ галаз санал каш-мекь ийиз яхцIурни цIуд йис жезва. Сагъ са асирдин са пай!

И йисара чна гзаф четинвилериз дурум гана. Шад, бахтлу легьзеяр гьиссна. Пакадин йи­къаз умуд кваз килигна. Жуван итимдилай анжах разивална.

Нубатдин сеферда кIвализ  фадлай чизвай дишегьли Салигьат атайла, завай лугьун хьана­: “За гьамиша жуван агалкьунар зи юлдашдин гьунарар яз гьисабна. Ам галачиз хьанайтlа, завай тухдалди са тике фу нез же­­дачир, я заз исятда авай къеле хьтин кlвалер аквадачир, я зи да­лудихъ галай дагълар хьтин рухваяр  дуьньядиз къведачир, я рикl сефил хьанмазди, ша лагьана,  гъидай дустарни жедайди тушир”.

Салигьата захъ, пIузаррик са жуьредин хъвер кваз, яб акалзавай. Зун кис хьайила, ам рахана. Наразидаказ. Заз тарс гудай тегьерда.

— Я руш-ш, вун гьинай ра­хазва эхир? На ви лайихлу­вилер, ви гъуьлуьз, кIвализ ба­гъишай шабагьар, серф авур вахтар вучиз рикIелай алуд­зава? Гъуьлуь ваз гайи гьар са затl на адав са шумуд сеферда артухни алаз вахкана. Ви зегьмет ада чlугур зегьметдилай мегер гъвечIиди яни? Ада кIва­лахиз, на хьрарик махар ахъайзавачир хьи.

— Ам гьакI я е-е, амма ада…

— Яб акала, — мадни гьевес акатна Салигьатак. — Са аммаярни авайди туш. Гьич са карни та­ву­­найтIани, вуна адаз  рухваяр багъишна, абур уьмуьрдин ре­кьел­ акъудна. Къе куьн хтулрин сагьибар я. КIвалер лугьузвани вуна? Эцигай кlвалерин къайи цлариз, мекьи хъуьтIуьз кIвализ чимивал гайи­ди вун тушни?! Гьар са ня­мет­ди­кай тIямлу хуьрекар гьазуриз, хизандин суфрадал гъайиди вуж я? Вун! КIвалах­ди­лай галатна, гуь­гьуьлар сериндиз хтай арай­ра, мили хъвер ба­гъишиз, рикl ачу­хиз, итимдин гуь­гьуьлар хкажначни, шадарначни на? Гьар экуьнахъ кlвала­хал физвай итимдив чуьхвена, уьтуь янавай парталар вугайди вуж я? Вун. Дустар мугь­ман­диз атайла, шад межлисарни ачух суфраяр шумудра къурмишна вуна? Агъзур сеферда. Ги­ла жу­ва­ фикир ая, мегер ви бахт, ви шадвал, ви къазанмишунар, ви хиз­андин агьваллувал анжах са итимдин ала­хъун­рилай аслу хьа­нани? Ваъ. Аник ви зегьметдин, ви къенивилин, камалдин еке пайни ква.

Юлдашдин гафарилай гуь­гъуь­низ зун фикирдик акатна. Дугъриданни, Салигьат гьахълу жезва. Итимдин, хизандин ва гьакI зи уьмуьрни лайихлуди  хьун са касдилай аслу тушир. Ис­лягь, къе­ни, гьуьрметлу, дуст­лу хи­зан­дин, дишегьлидин бахтунин иеси хьуник кIвалевай гьар садан пай квайдахъ инанмиш хьана зун. Къуй вирибурун кIва­лера гьуьрмет, берекат хьурай!

Гуьлжагьан Мисриханова