Вахтар къведа
И гуьлуьшан гатфарин вахт
Ма квез цуьквер лугьуз къвезва.
Сефил жез, шехьзавай живер,
Ятар хьана вацIуз къвезва.
Гъиз цуьквер чав вугай чIавуз,
Вахтунихъ чун агъай чIавуз,
ЧIехи жезва чи умудар,
Квахьда лугьуз а сергьят дар.
Тади ая, ша, гатфар, вун,
Чим тур рикIе, шадара чун.
Умудар ква чи вахтуник,
Чи халкь кутур на бахтуник.
Рушарин ким
Гатфарин вахтар, къацу хьанвай чил,
Акур рушарин,шад жеда гуьгьуьл.
Дестеяр хьана,кIватI жеда санал,
Лугьуз: “Ша, рушар, ацукьин инал.
Килиг, къацу векь гьеле я назик,
Чаз кутугнавай чка язва им.
Ийиз суьгьбетар, ахъайин сирер.
Кутада чна, рушарин са ким…”.
Махпурдиз ухшар векьери къацу
Чимивиляй, кьил хкажай виниз.
Яран марфари, дугурай цаву,
Гатазвай векьер, гьич инсаф тийиз.
Я тахьайтIа, къе кIватI жедани чун
Барзадихъ галай къайи булахдал?
Алахъдани сир чаз чира лугьуз,
Кьил хура тунвай, чIехи къавахдал.
СтIалри, хар хьиз, кIевиз акатай,
Векьин хаму тан эгечIна гатаз.
Хабарсуз, хъел кваз, гару акъатай,
Рушарин хиялар акъудна яргъаз.
Фена, кIватI хьана рушар са тарцик,
Яран югъ я къе, марф къвайитIани.
Кьежидач беден, ацукьин инал,
Кьуд пата къайи гар хьайитIани…
* * *
Гуьгьуьл пашман вилералди,
Хъвер кутаз кIанз канвай рикIик,
Заз вун кIан я, масад кIандач,
Лугьуз, цуьквер гайи ярди
Зун тек туна, масад кьуна,
Накь свас кIвализ гъайи ярди.
Белки, им зи бахт я, вахар,
Я тахьайтIа, бахтсузвиляй.
Санал жедай хьанач вахтар,
Фад акъатнай ам зи гъиляй.
* * *
Дуьньядиз чун къведай чIавуз
Пар кIулаваз къвезвайди я.
Вучиз чун и сувар юкъуз
ИкI перишан жезвайди я?
Перпилагар кутан гила,
Яраз лугьун, ша, манияр.
Маса жуьре рахан гила
Къведайвал патав кIани яр.
* * *
Такабурлу жемир куьн, заз яб це, рушар,
Закай свас хьуй са касдин,фидалди яшар.
КичIе я заз, кичIе я, амукьиз зун тек,
КIанзава заз къужахда кьадай са бицIек.
Ахпа жеда кIанивал, дидедиз ала,
Кьаз къужахда лугьудай: “зи ширин бала!”
КIанивилиз вафалу, ваз халис панагь,
Бала я, ви бала я, уьмуьрдин даях!
Зи кIанивал гуда за, баладиз жуван,
Дережайрив агакьрай лагьана кьакьан,
Жедач маса кIанивал дидедиз ала,
Кьаз къужахда лугьунлай, “зи ширин бала!”
Гуьлжагьан Мисриханова, Голландия
