Тамун къуш
Тамун къушра — иволгади
Зун ахварай авудна,
Мани лугьуз хуш сесинал,
Тарцел кьакьан ацукьна.
— Я гуьзел къуш, вуч хабар я,
Тама чка амачни ваз?
Ширин ахвар зи къакъудна,
Маса кlвалах авачни ваз?
Жаваб гана иволгади:
— Къарагъайтlа экуьнахъ фад,
Тlебиатдал къвезвайла чан,
Гуьгьуьл ачух, рикl жеда шад.
Вун ахварай авудна за,
Къарагъ экъечl къецел, шаир,
Билбилрин хуш манийрихъ на
Яб акала эвел, шаир.
Вун паталди тlебиатди
Ачухзава гуьзел цуьквер.
Пакаман кьезил шагьварди
Юзурзава тарцин пешер.
За ахварай авудна лугьуз
Багъишламиш ая на заз!
Шаир патал кхьидай са
Гуьзел шиир гана за ваз!
Чубарукдин муг
(Азимаз)
Чубарукар хтана,
Яргъал сефер алудна,
Муг туькlуьрун паталди
Кlвалин чlере хкудна.
Векьер, кьалар пешерни
Гъана цлак кукlурна,
Ахпа кlуфа кьаз вичин,
Чепедкай муг туькlуьрна.
Са кlус вахтни алатнач,
Чубарукдин мукуна
Гъвечlи-гъвечlи шарагар
Чаз вилерив акуна.
Бадеди чаз лагьана:
“Килиг, кямир шарагрик.
Гзаф гунагь кар я ам,
Чи чlередин зар я ам!”
Бадеди мад лагьана:
“Чубарукди муг авур
Кlвале бахтар бул жеда,
Берекатар — дул жеда”.
Зул атайла шарагар
Чlехи хьана, хуррам тир,
Абур акваз дидеяр
Мегьрибан тир, кlубан тир.
Куьч хъхьана къушар мад
Яргъал уьлквейриз чими.
Чи чlередик муг кума,
Ятlани вич гьакl ичlи.
Гуьзет ийиз жеда чун
Чими гатфар къведалди.
Мугни туькlуьр хъийида
Чубарук хкведалди.
Лезги чlал
Дидедин чlал, бубадин чlал,
Зи гуьзел чlал, зи лезги чlал.
Сифте яз за “диде” лагьай,
Играми тир зи багъри чlал.
Хьаначиртlа зи лезги чlал,
Жедачир захъ илгьамдин сес.
Хьаначиртlа зи лезги чlал,
Жедачир захъ шаирдин мез.
Рикlин кlусар кхьида за
Жуван хайи чlалал лезги.
Квез манияр лугьуда за
Жуван хайи чlалал лезги.
Зав дамах гва — чlал ава захъ,
Гуьзел нугъат — везин авай.
Зав дамах гва — чlал ава захъ,
Шалбузни Шагь — мензил авай!
Хуьх жуван чlал, девлет я ам,
Руьгьдин къуват, суьрсет я ам.
Чlалал лезги рахух, дустар,
За квез гузвай къимет я ам.
Ася Абасова, Хасавюрт шегьер
