И йикъара Каспийскда, физкультурадинни сагъламвал мягькемардай комплексда гьевескарвилин боксдин алемда кесерлу акъажунрикай сад яз гьисабзавай “Умаханован мемориал” кьиле фена. Алай йисуз и турнирда дуьньядин 22 уьлкведай атанвай 173 боксёрди заланвилин 10 (дишегьлийри заланвилин 5) категориядай чпин гъутарин устадвал къалурна. Гьамиша хьиз, и сефердани Дагъустандин хкянавай командади, кьилдин состав яз, иштиракна.
Командайрин арада заланвилин 13 категориядай къизилдин медалар къазанмишуналди (вири санлай 36 медаль), Россиядин хкянавай команда 1-чкадиз лайихлу хьана.
РикIел хкин: турнир кьиле тухуз эгечIай сифте йисара чи республикадиз Европадин гьевескарвилин боксдин ассоциациядин (ЕАБА) президент Эмил Жечев, Россиядин боксдин федерациядин президент Владимир Иванченков, ЕАБА-дин технический комиссиядин руководитель Александр Капустин ва маса ксар атанай. Турнир хъсан тешкиллувал аваз кьиле тухузвайдахъ инанмиш хьайила, абуру ам ЕАБА-ди кьиле тухузвай акъажунрин официальный календардик кутун патал чалишмишвилернай. Къенин юкъуз Россияда ихьтин дережа анжах са шумуд турнирдихъ ава.
Пешекарри къейдзавайвал, «Умаханован мемориал» вичин тешкиллувилел ва иштиракзавай спортсменрин кьадардал гьалтайла, неинки са Россияда, гьакI Европадани кесерлу турниррикай сад яз гьисабзава. “Умаханован мемориалди” чIехи боксдиз рехъ ачух авур дагъустанви спортсменрин арада ава: Олимпиададин чемпион Гьайдарбег Гьайдарбегов, Олимпиададин къугъунрин призёрар тир Султан Ибрагьимов, Мегьамед Арипгьажиев, Мегьамедрасул Межидов, Россиядин, Европадин ва дуьньядин чемпионатрин медалистар — Камил Жамалудинов, Тимур Гайдалов, Альберт Селимов, Руслан Хаиров, Гьабиб Аллагьвердиев ва гзаф масабур.
Къведай йисуз турнир 20-сеферда кьиле тухуда.
Рагнеда Рамалданова
