Алатай гьафтедин ял ядай йикъара Ленинграддин областдин Колпино шегьердин юбилейдин — 295 йис тамам хьунин — сергьятра аваз, “Аскервилин Баркалладин шегьеррин Гран-При”, адетдиз элкъвенвай, Вирироссиядин мастервилин турнир кьиле фена. Къейд авун лазим я хьи, турнирдин кьетIенвал а кардикай ибарат тир хьи, ина гъалибвал къазанмишай спортсменриз спортдин мастервилин тIвар ва Россиядин Кубок патал акъажунра иштиракдай мумкинвал гузвай…
Турнир кьиле фидалди са тIимил вахт амаз, чапнавай делилрал асаслу яз, какахьай единоборствойрай Россияда аккредитация къачунвай 86 федерациядикай 68 федерацияди и турнирда иштиракун патал заявкаяр ракъурнавай. ИкI, заланвилин 8 категориядай уьлкведин 140-далай виниз пагьливанри спортдин и жуьредай чпин устадвал ва алакьунар къалурна. Колпино шегьердиз атанвай багьа мугьманрин арада лезги дувулар авай руш, азаддаказ кьуршахар кьунай Олимпиададин чемпионка Наталья Воробьёвани авай.
Шад жедай кар мадни ам я хьи, и турнирда чи кьегьал кьве хци: Икрам Алискерова — 1 ва Нариман Эмирбегова 2-чкаяр кьуна. ИкI, 93 кг-дин заланвал авай спортсменрин арада вичин устадвал къалурай Икрам Алискероваз финалда дагъустанви Мегьамед Ибрагьимов, 61,2 кг-дал къведалди заланвал авайбурун арада бягьс кьиле тухвай Нариман Эмирбегов лагьайтIа, финалда Сагит Абдулаеваз (Дагъустан) кумукьна. Чна чи кьегьал рухвайриз нубатдин гъалибвилер тебрикзава, абурухъ спортдин рекье мадни кьакьан кукIушар муьтIуьгъардай къуватар хьун алхишзава.
Рагнеда Рамалданова
