Чун и йикъара дяведин махсус серенжемдай отпускдиз хтанвай «Женгерин гьерекатрин ветеран», «Дяведин махсус серенжемдин ветеран», «Жуьрэтлувиляй» ва Жукован медалрин сагьиб Артур Ибрагьимовахъ галаз таниш хьана.
Ибрагьимов Артур 1991-йисуз Дербент райондин Белиж поселокда, бинеяр Кьурагьай тир, Белиждин консервиярдай заводда рабочий яз кIвалахай, гила лайихлу пенсияда авай Эминан хизанда дидедиз хьана.
Поселокдин 2-нумрадин мектебдин 6-классда кIелдайла, ам спортдин мектебдин каратэ-кекусинкайдин секциядиз гьахьна ва ада машгьур тренер Апаев Радикан гъилик вердишвилер къачуна.
Мектебда вири предметрай хъсандиз кIелзавай гада спортдални рикI алаз машгъул жез гатIунна. Нетижаярни писбур тушир. Жаванрин арада физвай бягьсера ада вичин къилих къалурна, сифте районрин, ахпа зонайрин турнирра приздин, ахпа кIвенкIвечи чкаяр кьаз башламишна. 11-классда кIелдайла, ада каратэ-кекусинкайдай Дагъустандин чемпионатда иштиракдай путевка къазанмишна. Къастунал кIеви, руьгьдиз мягькем къуватлу гададик тренерди умуд кутунвай. Ам вичин заланвилин (55 кг) дережадай сад лагьай чкадиз лайихлу хьана.
Юкьван мектеб акьалтIарай 2008- йисуз Артур Иваново шегьердин госуниверситетдин экономикадин факультетдик экечIна. 2013-йисуз анаг агалкьунралди акьалтIарна.
2014-2020-йисара ада Росгвардиядин Махачкъалада авай 134-полкуна къуллугъна. КТО-да иштиракзавай А. Ибрагьимова вичин полкунихъ галаз махсус кьуд серенжемда иштиракна. И йисара абур Дагъустанда ракъур тавур чка хьанач. Иллаки гзаф вахтунда Сергокъалада, Шамилкъалада ва Белижда кьиле фейи терроризмдиз акси серенжемра иштиракна. Ватан хуьдайла, къалурай лайихлувилерай Артур Ибрагьимов «Женгерин гьерекатрин ветеран» медалдиз лайихлу хьана.
Махсус серенжем гатIундалди, ада Москвада гьар жуьре кIвалахар авуна.
– Чаз малум тирвал, 2023-йисалай вуна, гуьгьуьллудаказ икьрар кутIунна, дяведин махсус серенжемда иштиракзава. Хизанда авай са хва яз, ваз дидеди, дахди аниз фидай ихтияр ганани? — хабар кьуна за.
— Къагьриман муаллим, вун мумкин я мягьтелни хьун. Заз дидеди вуч лагьанатIа чидани? «Дяведиз физ, вири Ватан хуьз авайла, какайрал ацукьнавай верч хьиз, ви кIвале вуч авайди я? Алад, ватанпересрин жергедиз гьахь!»
– Дугъриданни, гьакI лагьанайни?
— Ваз, муаллим, зи диде чизвач. Ам викIегьди я, халис ватанперес я.
Инсульт хьана, кIвале авай Абият Абдулхаликьовнадиз Аллагьди сагъламвал гурай. Ватандихъ рикI кузвай ихьтин викIегь гьар са диде сагърай!
А. Ибрагьимова къуллугъзавай рота Запорожье галай патахъ ракъурна. Ина абур Бобриково хуьре акъвазна. Военный рекьяй тежриба авай Артур беспилотникрихъ галаз женг тухузвай, абурукай хуьзвай ротадиз аватна. Ротадин командир дарги я. Муькуьбур — дяведин еке тежриба авай «Вагнер» ЧВК-дин аскерар.
Махсус серенжемда саки са йисуз ада КамАЗ панцирдин шофер яз къуллугъна. И улакь виридалайни нетижалуди я. 100 км мензил амаз, адаз къвезвай душмандин БПЛА аквазва. Чи патаз агакьиз 20 км амайла, абуруз гуьлле гуз, 12 «ракета-карандаш» ахъайзава.
Уьлкведин хатасузвал хуьз, махсус серенжемра, женгера къалурай жуьрэтлувиляй, мягькемвиляй, дирибашвиляй А.Э. Ибрагьимов государстводин медалриз лайихлу хьана.
– Окопар мукьвал-мукьвал эгъуьндайвал жезвани? — мад жузуна за.
— Эгъуьнзава. Чун виликди физва. Цlийи чкадал къвезва. Чна къачур чкайра эгъуьннавай окопар, блиндажар, къазмаяр ава. Абур ишлемишайтIани жезва. Амма душмандиз чна къачур чкада чпин окопар, блиндажар, къазмаяр амайди чизва. Анра акъвазун, гьелбетда, хаталу я. ГьакI хьайила, жувни жуван юлдашар хатасуз авун патал, пер къачуна, цIийибур эгъуьнуниз мажбур жезва.
– Фронтда яшайиш гьикI я? Ял ядай мумкинвал жезвани?
— Фронтда уьмуьр давам жезвайди я. Женгинин везифаяр тамамардайла, ял ягъун гьина авайди я? Амай вахтунда чна ял ядай са гъвечIи вахт жагъурзава. Ина садбурув кацер, садбурув кицIер гва. Бязибуру цларал чпин багърийрин шикилар, аялри чIугунвай суьретар алкIурнава. Мукьвал-мукьвал чаз аялрин бахчайрин тербиячийрилай ва мектебрин аялрилай чарар, алхишар къвезва.
Артуран туькIвей хизанда уьмуьрдин юлдаш Карина кIвалин кайвани я. Абуру са рушни са гада тербияламишзава. Айшади 5-классда, Агьмада 2-классда кIелзава.
– Гележегда икьрарар кутIуниз кIанзавайбуруз вуна вуч лугьудай?
— Эгер рикIиз кIанзаватIа, гьакI авуна кIанда. За и кIвалах авуна. И кардал зун кIусни пашман туш. Эгер инсандиз кIан хьайитIа, адалай вири крар алакьда. Ватан душманрикай хуьдай къаст авайдаз сифте кам вегьез садани манийвалдач.
Чун гъалиб жеда!
Къагьриман Ибрагьимов
