Хъвадай целди
Региональный инвестпрограмма себеб яз, 170 агъзурдалай гзаф дагъустанвияр хъвадай михьи целди таъминарда. Идакай, РД-дин эцигунрин, архитектурадин ва ЖКХ-дин министр Бахтияр Уллаеван гафарал асаслу яз, Дагъустандин Гьукуматдин телеграм-каналди хабар гузва.
Чешмеди РД-дин премьер-министрди гъизвай делиларни раижзава: РИП-дин (республиканская инвестиционная программа) сергьятра аваз, 2025-йисуз, санлай къачурла, 1,77 миллиард манатдин къиметдин коммунальный 38 объект уьмуьрдиз кечирмишун фикирда кьунва.
Вичин нубатда Бахтияр Уллаева алава хъийизвайвал, винидихъ къалурнавайбурукай 36 объект целди таъминардайбур ва 2 объект яд санай масаниз акъуддайбур (водоотведения) я. Абур районрин ва Махачкъала шегьердин 3 посёлокдин мулкарал жеда. Ада хабар гузвайвал, объектар кардик кутунин нетижада 173,2 агъзур кас хъвадай целди таъминарда. Къейдзавайвал, 372,9 километрда цин турбаяр тухванва.
Пуд йисан къене
Дагъустанда балугъар гьялун пуд йисан къене 18 сеферда артух хьанва. Идакай, балугърин майишатдин Комитетдин председатель Х. Шамхаловадин гафарал асаслу яз, РД-дин Гьукуматдин телеграм-каналди хабар гузва.
Балугърин промышленностда абур гьялунин кьадар артух хьунин карда и хилен карханайриз, цIийи тадаракар къачурла, эвездин гьакъи хгунин программади кар алай роль къугъвана. Суьгьбетчидин гафаралди, санлай къачурла, 2022-йисалай инихъ Комитетди тахминан 360 миллион манатдин субсидияр ганва, 300-далай артух кIвалахдай чкаяр арадал гъанва.
Ракъинин электростанция
Дагъустанда гужлувал 102,3 МВт.-дикай ибарат тир Дербентдин ракъинин электростанция эцигунин проект агалкьунралди уьмуьрдиз кечирмишзава. Идакай РД-дин энергетикадин ва тарифрин министерстводин телеграм-каналди хабар гузва.
Чешмеди ам уьмуьрдиз кечирмишунин кар алай вахтар къалурзава:
— 305 гектардикай ибарат чилин участок, торгар галачиз, кирида вуганва;
— эцигунрин патахъай разивал къачунва (2024-йисан июнь);
— генеральный пудратдин икьрардал къул чIугунва (2024-йисан октябрь).
Гьа са вахтунда чешмеди раижзавайвал, алай вахтунда гьазур хьунин кар алай мярекатар кьилиз акъуднава: 2 километрда мулкарал паруяр чIугунва, фялеяр патал алай девирдин жуьредин яшамиш жедай чкаяр арадал гъанва (строительный городок), гьакIни чилин кIаникай коммуникацияр тухунин ва гележегдин ракъинин модулриз даяхрин конструкцияр эцигунин кIвалахар кьиле физва.
Чешмеди хабар гузвайвал, и объект кардик кутурла, кIвалахдин 25 чка арадал къведа, ам эцигунрин вахтунда лагьайтIа, — 200 чка.
Станция 2026-йисан 1-кварталда вахкун пландик кутунва. Къейдзавайвал, ихьтин объект арадал гъун региондин ВИЭ (возобновляемые источники энергии) вилик тухуник метлеблу пай кутун жеда.
ЦIийи делилар раижна
Дагъустанда 2025-йисан 7 вацра дуьньядал 24 730 аял атана. И делил, РД-дин здравоохраненидин министрдин заместитель Аздар Мирзоеван гафарал асаслу яз, Дагъустандин Гьукуматдин телеграм-каналди раижзава.
Республикада, виликан йисара хьиз, гилани аялар хьун артух жезва. Эгер 2025-йисан 7 вацра абурун кьадар, винидихъ къейднавайвал, 24 730 ятIа, шазан и муддатда аялрин сан 24 506 чагъадикай ибарат тир.
Алай вахтунда, дидедиз хьайила, бедендин заланвал гьатта 500 грамм тир аялрин сагъламвал мягькемарун патални къайгъу чIугвазва. Хабар гузвайвал, Дагъустандин духтурри къутармишай чагъадин бедендин заланвал виридалайни тIимилди хьайи дуьшуьш 480 грамм я.
Гзаф хьанва
РД-дин тамарин майишатдин Комитетдин председатель В. Абдулгьамидован гафаралди, цIи республикада тамари цIаяр кьур дуьшуьшрин кьадар гзаф хьанва — 11 дуьшуьш. Идакай «Дагъустан» РИА-ди хабар гузва.
Раижзавай къейдералди, шаз Дагъустанда тамари цIай кьур тек са дуьшуьш хьана. Гьа са вахтунда чешмеди хабар гузвайвал, алай йисуз тамарин фондунихъ галай чилерал вишералди чкайра цIаяр хкадарнава.
Гьазурайди — Муса Агьмедов
