Алатай йисан эхирра РФ-дин Общественный палатада “Золотые имена Высшей школы” конкурсдин гъалибчийрив шабагьар вахкана. Къейд ийин хьи, конкурс РФ-дин Президент В. Путина, РФ-дин илимдин ва кьилин образованидин мини­с­терстводи, Общественный палатади тереф хвейи “Лига преподавателей высшей школы” про­ект­дин сергьятра аваз тешкилнавай. Шад же­дай кар ам я хьи, уьлкведин 76 региондин вузрин­ муаллимри иштиракай конкурсдин гъалибчийрин арада ДГТУ-дин праводин ва улакьар идара авунин фа­культетдин декан, технический илимрин канди­дат, чи ватанэгьли  Эдвард  Батмановни  авай.

Конкурс са шумуд номинациядикай ибарат тир. Э.Батманова “За преданность профессии и продолжение традиций российской высшей школы” номинацияда 1-чка кьуна.

Эдвард Загьидинович Батманов Кьурагь район­дин КIирийрин хуьряй я. Хъсан къиметар аваз ДГТУ­ акьалтIарайдалай кьулухъ ада кIелунар аспи­ран­турада давамарна, илимрин кандидатвилин диссертация хвена. 2004-йисалай винидихъ тIвар кьур вуз­да кIвалахзава. Кафедрадин заведующий, де­кан­дин заместитель яз. 2013-йисалай инихъ улакь­рихъ галаз алакъалу факультетдиз регьбервал гузва­.

Алимдин гъиликай учебный 9 пособие хкатна­ва­. Ам гьакIни методикадин ва илимдин месэлайрай кхьен­вай 63 макъаладин, 3 монографиядин автор я.

Эдвард Батмановахъ вузда санал кIвалах­за­вай юлдашрин, студентрин арада еке гьуьрмет ава. Адан тIвар Урусатдин вузрин муаллимрин Гьуьр­метдин ктабда гьатуни алимдин пешекарви­лин дережадин, илимдин рекье адахъ авай агалкьунрин гьакъиндай шагьидвалзава.

“Золотые имена Высшей школы” конкурсдин гъа­либчияр тебрикзавай мярекатда РФ-дин Прези­дентдин Администрациядин жемиятдин проектриз та­­лукь Управленидин пешекар, эксперт Азамат То­маева, Президентдин грантрин фондунин генеральный директордин заместитель Иннокентий Дементьева, РФ-дин илимдин ва кьилин обра­зованидин ми­­­нистр Валерий Фалькова ва масабуру ишти­ракна­.­­

Гъалибчидин дипломдилай, махсус знакдилай­ ва шагьадатнамадилай гъейри, Эдвард Батмановаз РФ-дин илимдин ва кьилин образованидин ми­нистрдин заместителдин къул алай Разивилин чарни гана. “Кнорус” чапханади Дагъустандай тир алимдиз учебный пособие ва я монография гьа­вая акъу­дун патал махсус сертификат багъиш­на.

Къейд ийин хьи, Эдвард Батманов “Лезги газетдин” вафалу амадагрикайни сад я. Газет кхьизвай вахтунда ада хайи чIалал акъатзавай изданидин тираж хкажуник вичин пайни кутазва.

Чна Эдвард Загьидиновичаз илимдин рекье нубатдин агалкьун мубаракзава. Адахъ инлай кьулухъ мадни кьакьан кукIушар муьтIуьгъардай къуватар хьун чи мурад я.

Агьмед Магьмудов