14-февралдиз Дагъустандин духтурханайриз тади куьмекдин 10 улакьни медицинадин санай масаниз тухуз жедай 12 къурулуш (модулдин ФАП-ар) чара авунва. Медидарайрин кьилин духтуррив куьлегар вахкуниз талукьарнавай мярекат 14-февралдиз Махачкъалада кьиле фена.
“Лезги газетдиз” РД-дин Гьукуматдин пресс-къуллугъди хабар гайивал, ана вице-премьер Абдурагьман Магьмудовани РД-дин здравоохраненидин министр Татьяна Беляевади иштиракна.
Къейд ийин хьи, цIийи улакьар Дагъустандин духтурханаяр патал РФ-дин промышленностдин ва алишверишдин министерстводи маса къачуна. Модулдин ФАП-ар медицинадин рекьяй алай аямдин истемишунар фикирда кьуна туькIуьрнава. Абура, глюкометрдилай гатIунна, ИВЛ-дин аппаратдал къведалди хейлин тадаракар ава.
А.Магьмудова хабар гайивал, эхиримжи 2 йисан къене республикадив махсус программадин сергьятра аваз медицинадин 282 улакь агакьнава. Алай йисуз лагьайтIа, региондин духтурханаяр патал алава 90 улакь маса къачудайвал я.
Чи мухбир
