6-июндиз Москвада, Россиядин къецепатан крарин министерстводин (МИД) Медениятдин центрада, Дагъустандин экономикадин, инвестицийрин ва туризмдин хилериз талукь презентация кьиле фена. Мярекатда уьлкведин къецепатан крарин министр Сергей Лавровани РД-дин Кьил Сергей Меликова иштиракна.
Сергей Лавров Дагъустандин карханайрин кар алай проектрихъ, республикадин халкьарин сеняткарвилерихъ ва чкадин майишатри гьасилзавай суьрсетрихъ галаз таниш хьана. Дагъларин уьлкведин экспозициядикай федеральный дережадин министрдиз Сергей Меликова ихтилатна. Ада къейд авурвал, Дагъустандин инвестицийрин кар алай проектрин арада Россияда чIехибурукай сад тир «Салаватстекло» кархана, полимердин турбаяр акъудзавай «Эксонор» завод, Каспийдин къерехдин кластер, КЭМЗ ва масабур ава.
РФ-дин МИД-дин регьберди Дагъустандихъ экономикадинни инвестицийрин рекьяй авай мумкинвилериз еке къимет гана. Адан гафаралди, промышленностдинни туризмдин проектар, республикада гьасилзавай хъсан еридин суьрсет гзаф уьлквейриз итижлу хьун мумкин я.
«Дагъустан Россиядин дурумлудаказ виликди физвай регионрикай сад я. Экономикадин жигьетдай кар алай хилерик хуьруьн майишат, недай-хъвадай ва гьялдай промышленность, машинар акъудзавай карханаяр акатзава. Ина индустриальный ирид парк кардик ква. Географиядин жигьетдайни Дагъустан пара къулай, инфраструктура вилик тухудай мумкинвилер авай чкада экIя хьанва. Международный дережада аваз алишвериш, логистика еримлу ийидай шартIарни авачиз туш», — лагьана С. Лаврова.
Министрди гьакIни къейд авурвал, Дагъустандихъ къадим ва девлетлу тарих, медениятдин ирс ава. Иниз къвезвай мугьманар лагьайтIа, пара иер тIебиатди, фикир желбдай чкайри вилив хуьзва.
«Алай вахтунда Дагъустанди, санлай къачурла, къецепатан 60-далай виниз уьлквейрихъ галаз амадагвилин алакъаяр арадал гъанва. Чи министерстводи, къецепатан уьлквейра кардик квай векилханайри, РФ-дин Президент Владимир Путина Россияди къецепатан уьлквейрихъ галаз тухузвай сиясатдин жигьетдай тестикьарнавай сад тир курсунал бинеламиш хьана, Дагъустан хьтин регионриз идалай кьулухъни куьмекар гуда», — алава хъувуна С.Лаврова.
ЧIехи Гъалибвилин 80 йисан юбилейдикай, алай вахтунда Украинада кьиле физвай махсус серенжемдикай рахадайла, РФ-дин МИД-дин регьберди гьам Ватандин ЧIехи дяведин йисара, гьамни чи йикъара дагъустанвийри уьлкведин азадвал, аслу туширвал хуьнин карда акьалтIай викIегьвилер къалурайди ва и кар гилани давамарзавайди къейдна.
Вичин нубатда Сергей Меликова Дагъустандиз презентация тешкилдай мумкинвилер гунай Сергей Лавроваз сагърай лагьана.
«И гуьруьшди квез гьакьван итижлу макандин экономикадихъ, туризмдихъ, инвестицийрихъ, медениятдинни тарихдин девлетлу ирсинихъ галаз мадни мукьувай таниш хьунин карда куьмек гудайдак за умудар кутунва», — лагьана Дагъустандин Кьили, мярекатдин иштиракчийрихъ элкъвена.
«Чи республикада сиягьат авун ва туризм вилик тухун патал вири мумкинвилер ава. Кьиблепата, Каспий гьуьлуьн къерехда, Самурдин надир там экIя хьанва. Кеферпата — къумлухарни фикир желбдай синер. Шаркь пата са шумуд виш километрдин мензилра хъсан пляжар ава. РагъакIидай патани гзафбуруз машгьур хьанвай Сулакдин дерин дагьарди (каньон) агъзурралди мугьманар вичел желбзава.
Дагъустанда чи уьлкведин виридалайни къадим шегьер — Дербент ава. Бязи тарихчийрин гьисабунралди, тарихдин надир къеле авай и шегьердин агъа кIан вад агъзур йис я. Дагъларин уьлкведин са жерге районрани чпин яшар са шумуд агъзур йисалай алатнавай куьгьне хуьрерни ава. Кьилинди – Дагъустан Россияда виридалайни гзаф миллетар яшамиш жезвай регион я…», — лагьана Сергей Меликова.
РФ-дин МИД-да кьиле фейи презентациядихъ чи республика патал, гьакъикъатдани, еке метлеб ава. И мярекатдилай кьулухъ ана иштиракай 80-далай виниз уьлквейрин векилри чпихъ Дагъустандихъ галаз мукьувай таниш жедай ашкъи авайдакай хабар гана. Абурун арада Пакистандин, Сенегалдин, Анголадин, Доминиканадин, Мозамбикдин, Туьркменистандин ва маса уьлквейрин векилар авай.
Презентациядикай гегьеншдиз РД-дин Кьилин сайтдай кIелиз жеда.
Агьмед Магьмудов
