5-июндиз РФ-дин Президент Владимир Путина Россиядин халкьарин чIаларин югъ арадал гъун ва ам гьар йисуз 8-сентябрдиз (Дагъустандин халкьдин шаир Расул Гьамзатов хайи юкъуз) къейд авун теклифна. Милли чIалариз уьлкведин дережада фикир гун анжах шад жедай кар я.
Къейд ийин, 29-майдиз РД-дин Кьил Сергей Меликова Халкьдин Собранидиз кIелай Чарче къарагъарнавай месэлайрик Дагъустандин милли чIалар хуьниз талукьдини квай. Ада милли чIалар хуьнин госпрограмма кьабулун теклифна.
РикIел хкин, дуьньядин халкьари гьар йисан 21-февралдиз хайи чIаларин югъ къейдзава. Чи республикада лагьайтIа, 21-октябрни Дагъустандин медениятдин ва чIаларин югъ я. Идалайни гъейри, эхиримжи йисара 10-октябрь Лезги чIалан югъ яз къейдзава. Гила, Россиядин халкьарин чIаларин йикъан сергьятра аваз, милли чIаларин, медениятрин гележег хъсанарун патал алава серенжемар кьабулда.
«Лезги газет»
