Махсус серенжемдикай
РФ-дин оборонадин министерстводи 8-январдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 365 самолет ва 199 вертолет, зенитный ракетайрин 400 комплекс, пилот галачиз лув гудай 2848 аппарат, 7449 танк ва дяведин маса машинар, РСЗО-дин 972 машин, артиллериядин ва маса 3787 яракь, военный махсус 7965 автомашин тергна.
ПВО-дин кIвалах гужлу ийида
ДНР-дин кар алай къурулушрин объектриз Украинадин кьушунри цIай гузвайвиляй Россияди ПВО-дин такьатрин ва контрбатареядин кIвалахар гужлу ийизва. “Новости” РИА-ди хабар гузвайвал, идакай ДНР-дин кьилин везифаяр вахтуналди тамамарзавай Д.Пушилина малумарна.
“Виликдай хьиз, исятдани душманри НАТО-дин яракьар ишлемишзава, ислягь агьалияр яшамиш жезвай сектордиз зиянар жезва. Мидяйри чими ийидай тадаракар, газдин ва цин къурулушар тергунин макьсад вилик эцигзава”, — лагьана Д.Пушилина “Россия 24” каналдиз гайи интервьюда.
Адан гафаралди, Украинадин кьушунри Старобешевскдин ТЭС-дал гьужумунин нетижада кьве къуллугъчи кьена.
ЧIехи пай ама
Россиядин базарра къецепатан тешкилатрикай 75,9 процент ама. Идакай Госдумадин Председатель В.Володина вичин телеграм-каналда кхьена.
“И къарарди гзаф крарикай лугьузва: абур чи уьлкведин экономика вилик финин хъсан мумкинвилерихъ инанмиш я, абуруз карчивилин алакъаяр хуш я. Хъфейбурай миллиардралди харжияр акъатзава. Чи хсуси карханайри буш хьайи чкаяр кьазва, гьасилзавай затIарин кьадар артухарзава”, — къейднава ада.
Адан фикирдалди, парталар арадал гъунин кар уьлкведа 42 процентдин артух хьанва, дарманар акъудун — 15 процентдин.
Интернетда гьужумар
Украинадин махсус къуллугъри эхиримжи йикъара Крымдин темадай соцсетра информациядин гьужумар кьилиз акъудун артухарнава. “Новости” РИА-ди хабар гузвайвал, идакай Крым республикадин кьилин меслятчи О.Крючкова малумарна.
“ЦIийи йис Украинадин махсус къуллугъри информациядин майданра кIвалах гегьеншарунилай башламиш хьанва. Кьилин темайрикай сад Крым я. Соцсетра Крымдин кьилдин шегьерриз талукь кIватIалар арадал гъизва ва анриз жуьреба-жуьре тапан малуматар чукIурзава”, — кхьенва Крючкова вичин телеграм-каналда.
Ада интернетдикай менфят къачузвайбуруз тапан малуматрихъ инанмиш тахьун, анжах официальный СМИ-риз, чешмейриз ихтибар авун меслят къалурна.
МуркIадин гьамбарар цIразва
Вири халкьарин алимрин дестеди хабар гузвайвал, 2100-йисалди Чилел алай муркIарин еке гьамбаррин заланвал, глобальный чимивилер себеб яз, 26 процентдилай 41-дал кьван тIимил жеда. Пешекаррин ахтармишунрин нетижаяр “Science” журналда чапнава.
Багьа хьанва
Европада агъзур кубометр газдин къимет 800 доллардилай виниз хкаж хьанва. Лондондин “ICE” биржадин делилрал асаслу яз, идакай “Новости” РИА-ди 9-январдиз хабар гана.
Европада газдин къимет 2021-йисан гатфарилай багьа жез башламишна. А чIавуз агъзур кубометрдин къимет 250-300 доллар тир, амма гатун эхирра 600 доллардив агакьна, зулуз — 1000 доллардив. 2022-йисан гатфарин эвел кьилера, Россиядин энергоресурсар къадагъа авунин къурхулувал себеб яз, агъзур кубометр газдин къимет садрани тахьай хьтин 3892 доллардив агакьна.
Танкар ракъурдайвал я
Польшади Украинадиз “Leopard” танкар цIудралди ва я вишералди ваъ, са тIимил ракъурда. “Новости” РИА-ди хабар гузвайвал, ихьтин фикир Польшадин президентдин канцеляриядин векилди малумарна.
Вахкун тIалабнава
Украинадин дипломатди малумарнавайвал, Киевди Тбилисидивай 2008-йисуз вугай зенитдинни ракетайрин “Бук” комплекс вахкун тIалабнава. Идакай “Европадин гьакъикъат” изданида чапнавай А.Касьянован макъалада лагьанва.
Къушарин грипп
Японияда къушарин грипп пайда хьуникди верчер миллионралди тергзава. Идакай “Новости” РИА-ди хабар гана.
Уьлкведин хуьруьн майишатдин министерстводин делилралди, грипп себеб яз 2020-йисуз уьлкведа 9,87 миллион къуш тергнайтIа, гила, гьеле гриппдин сезон куьтягь тахьанмаз, саки 10 миллион верч тергнава.
«Лезги газет»
