И йикъара эдебиятдин “Российский писатель” сайтда (ам Урусатдин писателрин Союздин медиа-ресурс я) 2022-йисуз уьлкведин дережада аваз писателрин арада кьиле тухвай конкурсдин нетижаяр кьуна. Изданиди хабар гузвайвал, конкурсдиз са агъзурдалай гзаф кIвалахар рекье тунвай.
Шад жедай кар ам я хьи, “Позиция” номинацияда Дагъустандин халкьдин шаир Арбен Къардаш гъалиб хьана. Адан “Ответ запоздавшему фантазёру” тIвар алай макъала виридалайни хъсанди яз гьисабна.
Къейд ийин хьи, и макъалада шаирди вири дуьньядиз машгьур классик Низами Генжевидин биографиядин са акьван малум тушир чинар ахтармишнава ва чIехи шаирдин бинедихъ лезги дувулар авайди субутна.
РикIел хкин, Арбен Къардашан “Ответ запоздавшему фантазёру” макъала “Литературный Азербайджан” журналдин 2021-йисан 11-нумрадиз акъатай Азербайжандин профессор Низами Тагисойан “Инсинуации вокруг происхождения и принадлежности Низами Гянджеви к азербайджанской литературе” макъаладиз хганвай жаваб я.
“Лезги газетдин” редакциядин коллективди Арбен Къардашаз и агалкьун рикIин сидкьидай мубаракзава ва адахъ яратмишунрин рекье мадни чIехи гъалибвилер хьана кIанзава. Лайихлу гъалибвал я.
«ЛГ»
