Махсус серенжемдикай

Украина Россиядиз акси уьлкведиз элкъуьриз  кIан хьунин РагъакIидай патан планар кьилиз акъудиз тутун патал военный махсус серенжем кьиле тухун чарасуз хьанвай. Ихьтин фикир 19-декабрдиз Минскда РФ-дин къецепатан крарин министр С.Лаврова лагьана. Адан гафар “Новости” РИА-ди раижна.

“СВО-дин сергьятра аваз чна кьабулзавай серенжемриз Рагъ­акIидай пата США-дин эмирдалди таъсирзавай тегьердини махсус серенжем кьиле тухун чарасуз хьайиди тестикьарзава”, — лагьана министрди.

ЦIийи къанун

Госдумади Георгийдин лент кьацIурунай, мурдарунай 5 мил­лион манатдал кьван жерме авунин ва я 5 йисал кьван азадвиликай магьрумунин гьакъиндай къанун кьабулнава. Идакай “Новости” РИА-ди хабар гана.

Кьабулнавай цIийи къанунди Георгийдин лент аскервилин баркаллувилин яржарикай сад яз тестикьарзава. Къанундин проект теклифайбур “Сад тир Россия” партиядин генсоветдин секре­тарь Андрей Турчак ва Госдумадин ватандашвилин общество еримлу авунин комитетдин кьилин заместитель Ольга Занко я.

А.Турчака къейд авурвал, къанундал асаслу яз, Георгийдин лент анжах тарихдин рикIел хкунрихъ галаз алакъалу макьсадра ишлемишиз жеда, маса рекьера ишлемишуни къанун чIурда.

Къадагъа алач

ООН-да Ирандин векил Амир Саид Ираваниди 20-декабрдиз рикIел хкайвал, Иранди маса уьлквейриз ва Ирандиз маса уьлквейри яракьар гунал, ООН-дин Совбездин 2231 лагьай къарардал асаслу яз, мад къадагъа аламач. Идакай “Новости” РИА-ди хабар гана.

РагъакIидай патан уьлквейри эхиримжи вахтара Иранди гуя Россиядив пилот галачир аппаратар агакьарзава лугьуз тестикьарзава. Москвадини Тегеранди им бине авачир тестикьарун тирди малумарна. Ирандин МИД-дин кьил Х.А.Абдоллахиана идалай вилик къейд авунай хьи, Тегеранди Москвадиз пилот га­лачир аппаратар Украинада махсус серенжем башламишдалди са шумуд вацран вилик ракъурнавай.

Садавайни кIун ягъиз жедач

Белоруссиядин президент А.Лукашенкоди къейд авурвал, Москвадинни Минскдин арадиз садавайни кIун ягъиз жедач. ­“Но­вости” РИА-ди хабар гузвайвал, ихьтин фикир ада Минскда 19-декабрдиз Россиядин регьбер В.Путинахъ галаз хьайи гуь­руьшди­лай кьулухъ кьиле фейи умуми пресс-конференциядал лагьана.

“Эгер са ни ятIа къе чи алакъаяр атIуникай, арадиз кIун ягъуникай фикирзаватIа, и кар садавайни кьилиз акъудиз жедач”, — лагьана ада.

Лукашенкодин гафаралди, 2020-йисуз Белоруссияда президентдин сечкийрин нетижайриз акси какахьай гьалар арадал атайла, “Россияди гъил яргъи авуна”.

Сунакалай нарази я

“The Daily Mail” изданидин кIелчийри Великобританиядин премьер-министр Р.Сунака Россиядинни Украинадин арада меслятдин рахунар кьиле финикай лагьай фикирар нагьакьанбур яз гьисабна.

Идалай вилик Сунака алай вахтунин шартIара Украинада къалмакъал акъвазаруникай меслятдин рахунар авунихъ са метлебни авач лагьанай. Гьа са вахтунда ада Украинадин терефдиз куьмек гун давамарун кьетIнава, гьа жергедай яз ПВО-дин системайрин, бронетехникадин жигьетдайни.

“Медсестраяр патал пул авач, амма бомбаяр патал ава. ГьакI яни, Риши Сунак?” — суал ганва са кIелчиди премьер-министрдиз.

“Мягьтел жедай кар я, Украина патал ада мад кьве миллиард стерлингрин фунт гьикI жагъурзавайди я. Чи уьлкведа инсанар кесибвиле ава. Кар алай месэлаяр дуьздаказ вилик эциг!” — истемишзава са маса агьалиди Р.Сунакавай.

“Сунака сифте нубатда британвийрин, вичин уьлкведин гьа­къин­дай къайгъу чIугваз мус башламишда? Алай вахтунда ада чалай гзаф масабурукай фикирзава. Ада рикIел хвена кIанда хьи, ам Украинадин ваъ, Великобританиядин премьер-министр я”, — къейднава мад са кIелчиди.

РФ-дин Президент Владимир Путина къейд авурвал, Украинадин гьакъиндай рахунар кьиле тухуниз Россиядин тереф гьазур тирдакай гьамиша лагьанай. Гьа са вахтунда РагъакIидай патан уьлквейри Украинади женгинин гьерекатар давамарун герек тирдакай малумарзава, аниз яракьар ракъурзава ва чпин уьлквейра украинви женгчияр гьазурзава.

“Гъуьрчехъан” дрон

Россиядин “Гъуьрчехъан” (“Охотник”) дрондиз тешпигьди НАТО-дин гьич са уьлкведихъни авач. ЦIийи яракьдикай “Ростех” госкорпорациядин генеральный директор В.Артякова “Россия-24” телеканалдиз гайи интервьюда лагьана.

Артякова къейд авурвал, пилот галачиз лув гудай аппарат кьетIенди я, ада искусственный акьулдин технологийрин бинедаллаз кIвалахзава. “Гъуьрчехъан” къведай йисуз синагъ ийидай­ фикир ава.

«Лезги газет»