Сергей Меликова Дагъустанда кьилиз акъуднавай инвестицийрин проектрикай малуматар гана
20-декабрдиз РД-дин Кьил Сергей Меликова Кеферпатан Кавказдин федеральный округ вилик тухунин ва инвестицийрин проектар кьилиз акъудунин месэлайрай РФ-дин Гьукуматдин Председателдин заместитель Александр Новакан регьбервилик кваз кьиле фейи стратегиядин сессияда иштиракна. Идакай республикадин Кьилин пресс-къуллугъди хабар гузва.
Сессиядин кIвалахда иштиракайбурун арада гьакIни СКФО-да РФ-дин Векил Юрий Чайка, РФ-дин экономикадин рекьяй вилик финин министр Максим Решетников, Кеферпатан Кавказдин регионрин кьилер, “Кавказ.РФ” корпорациядин генеральный директор Андрей Юмшанов, банкарин ва жуьреба-жуьре институтрин векилар авай.
“Кеферпатан Кавказдин регионар вилик тухун абур экономикадин рекьяй вилик финихъ галаз алакъалу ийизва. И кар инвестицияр желб авунилай, хсуси производство вилик тухунилай, кIвалахдай цIийи чкаяр арадал гъунилай аслу я”, — лагьана М.Решетникова.
Сессиядин сергьятра аваз са бязи регионрин кьилерни рахана. Абурун арада Дагъустандин Кьил Сергей Меликовни авай. Ада жезмай кьван гзаф инвестицияр желб авун патал республикада кьиле тухузвай кIвалахдикай ихтилатна. И жигьетдай къазанмишнавай нетижайрикай рахадайла, ада къейд авурвал, 2022-йисан январь-сентябрь варцара инвестицийрин умуми кьадарди 100 миллиарддилай виниз тешкилнава. Сергей Меликован гафаралди, Дагъустанда промышленностдин производство, хуьруьн майишатдин, эцигунрин хилер йигин камаралди вилик физва.
Дагъустандин Кьили гьакIни хабар гайивал, цIи республикада умуми къимет 4 миллиард манатдиз барабар тир инвестицийрин 5 проект кьилиз акъуднава. Абурун арада Южно-Сухокумск шегьерда эцигнавай ракъинин электростанция, Дагъустандин Огни шегьерда ачухнавай шуьшедин шарар акъуддай завод, республикадин меркезда кардик акатнавай медицинадин кислород арадал гъизвай производство, Дербент шегьердин ципицIар гьялдай цIийи завод ва эцигунра ишлемишдай кьурай къаришмаяр (сухие смеси) арадал гъидай завод ава.
Агьмед Магьмудов
