Дагъустанда Гьукуматдин Председателдин заместителрин

кIвалахдиз къимет гудай махсус институт арадал гъида

20-декабрдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз Дагъустан стратегиядин рекьяй вилик финин мес­элайриз ва проектрин кIвалахдиз талукь Советдин президиумдин заседание кьиле фена. Анал регионда милли проектар кьилиз акъудунин месэлаяр веревирдна. Гьар са проектдин гьакъиндай министерствойринни ведомствойрин кьилери гьахъ-гьисаб авуна.

Мярекатдин асул паюнив эгечIдалди вилик Абдулмуслим Абдулмуслимова Дагъустанда вице-премьеррин кIвалахдиз къимет гудай махсус институт кардик кутадайдакай хабар гана.

“Вице-премьер вичи гуьзчивал тухузвай хиле государстводин сиясатдин патахъай жа­ваб гузвай кас я. Республикада тешкилиз кIан­завай институтди федеральный дережада авазни кIвалахзава. КIвалахдиз къимет гуз­вай рекьерикай сад милли проектар кьилиз акъудунин жигьетдай авай нетижаяр же­да”, — лагьана РД-дин Гьукуматдин Председателди.

Гуьгъуьнлай ада къейд авурвал, республикада милли проектар кьилиз акъудуниз ча­ра авунвай пулунин такьатрин 73 процент иш­лемишнава. Анжах 5 проектдиз чара авунвай­ такьатар тамамдиз ишлемишна акьалтIар­нава. Абурун арада “Производительность труда”, “Туризм и индустрия гостеприимства”, “Безопасные и качественные дороги”, “Цифровая экономика” ва “Экология” проектар ава.

“Гьар са проект республикадин агьалийрин кар алай месэлаяр гьялунин макьсаддалди кардик кутунва. Гьавиляй абур вахтун­да ва тамамдиз кьилиз акъудна акьал­тIа­ру­низ абурал гуьзчивал тухузвай жавабдар ксари кьетIен фикир гун герек я. Чи виридан умуми кIвалахдиз гьа проектар кьилиз акъуд­навай гьалариз килигна къимет гузва”, — къейд­на А.Абдулмуслимова.

Дагъустанда милли проектар кьилиз акъу­дуниз талукь гегьенш малуматар РД-дин Гьукуматдин официальный сайтдай кIе­лиз жеда.

Агьмед Магьмудов