Акъвазарун мумкин я
РФ-дин Хатасузвилин Советдин Председателдин заместитель Дмитрий Медведева гележегда Урусатди Япониядиз газни нафт агакьарун акъвазарун мумкин тирдакай хабар гана.
Къейд ийин хьи, мукьвара Япониядин премьер-министр Фумио Кисидади Урусатдин нафт маса къачудай цIийи къиметар тайинарун теклифна. Адан фикирдалди, и месэладиз талукь цIийи рекъемар алай вахтунда авай къиметдин са паюнилай гзаф тахьун лазим я.
Д.Медведеван фикирдалди, эгер Токиодин гьукумдин векилдин теклиф кьилиз акъудайтIа, базарда нафтIадин кьадар садлагьана — тIимил, къимет багьа жеда.
“Япониядихъ лагьайтIа, Урусатдин я газ жедач, я нафт…”, — алава хъувуна Д.Медведева.
Шойгуди малумарна
“lenta.ru” изданиди хабар гузвайвал, Урусатди Украинада кьиле тухузвай военный махсус серенжемдиз срочникар тир аскерар рекье твадач. И месэладин гьакъиндай уьлкведин оборонадин министр Сергей Шойгуди малумарна.
“За виликдайни къейд авурвал, армияда эвер гана (призыв) къуллугъзавайбур махсус серенжем кьиле физвай зонадиз ракъурзавач”, — лагьана С.Шойгуди, селекторный совещание кьиле тухудайла.
РикIел хкин, алай йисан мартдин вацра федеральный СМИ-ри Украинада кьиле физвай махсус серенжемда армияда эвер гана къуллугъзавай аскеррини иштиракзавайдакай раижнай. И малуматдин гьакъиндай баянар гудайла, РФ-дин оборонадин министерстводин векил, генерал-майор Игорь Конашенкова къейд авурвал, гьакъикъатдани, Урусатдин Яракьлу Къуватрин операцияда иштиракзавай кьушунра армияда эвер гана къуллугъзавай са шумуд аскер авай. Амма абур вири Урусатдиз хкана. Исятда Украинадин мулкарал давам жезвай махсус серенжемда ахьтин са аскерни авач.
Нетижаяр кьуна
ТАСС-ди хабар гузвайвал, Урусатда Сад тир имтигьандин (ЕГЭ) нетижада цIи мектебар акьалтIарай аялрикай 16 касди пуд предметдай, санлай къачурла, 300 балл къазанмишнава.
Рособрнадзордин кьил Анзор Музаеван гафарай якъин хьайивал, 200 балл къачур аялрин кьадар 380-далай алатна. Пуд предметдай 100 балл 6544 аялдихъ хьана.
А.Музаеван фикирдалди, цIи Сад тир имтигьан, санлай къачурла, секин гьалара кьиле фена. Имтигьан вахкузвай чIавуз аудиторийрай шпаргалкаяр ишлемишунай — 346, алакъадин такьатрикай менфят къачунай 298 аял акъудна.
Индияда — мусибат
Индиядин Манипур штатда чил уьцIуьнин нетижада 48 кас телеф хьана. Идакай “lenta.ru” изданиди хабар гузва.
Чкадин гьукумдин официальный малуматрай якъин жезвайвал, и рекъем дегиш хьун мумкин я, гьикI лагьайтIа, мусибатдин дуьшуьш арадал атай чкадал кIвалахар гьеле давам жезва.
Къейд ийин хьи, чил ракьун рекьин эцигунардай “Тупул-ярд” лагерь алай мулкарал уьцIена. Телеф хьанвайбурни асул гьисабдай и лагердин къаравулар я.
РикIел хкин, алай йисан 20-июндиз Индиядин кеферпатани шаркь пата яд акьалтунин нетижада — 71 кас телеф, 4 миллиондилай виниз агьалийриз зиянар хьана.
Багьа хьанва
Европада электроэнергиядин къимет садлагьана багьа хьанва. СМИ-рин малуматралди, и кар Урусатдай Европадин уьлквейриз газ рекье тун акъвазарунихъ галаз алакъалу я.
Къиметар виридалайни гзаф хкаж хьанвай уьлквейрин арада Германияни Франция ава.
Крокодилдин къармахрай
“Pragativadi” изданиди хабар гузвайвал, Индиядин Одиша штатдин Бадейджорамухен хуьруьн агьали крокодилдихъ галаз кьиле фейи женгина гъалиб хьана.
45 йис хьанвай Нитьянанда Патра кIвачер — гъилер чуьхуьн патал вичин кIвалин патавай авахьзавай вацIал фена. Садлагьана цяй экъечIай крокодил адан гардандик ккIана ва ам циз галчIурна. Са гьихьтин ятIани аламатдин къайдада итимдилай масадан куьмек галачиз къуватлу гъилералди вичин гардан крокодилдин рекъверай ахкъудиз алакьна.
110 йис хьанва
Дуьньядин винел виридалайни яшлу инсанрикай сад США-да яшамиш жезва. Калифорния штатдай тир Конни Дикена мукьвара 110 йисан юбилей къейдна.
Дишегьлидин фикирдалди, адан яргъи уьмуьр къекъуьнихъ ва кьуьлер авунихъ галаз алакъалу я. “Фу недалди, за кьуьлер ийида”, — лугьузва ада.
90 йис жедалди, дишегьли гьар юкъуз 5 километр мензилда къекъвезвай. Алай вахтунда ада и мензил километрни зурал кьван тIимиларнава.
Гьазурайди — Агьмед Магьмудов
