Алатай гьафтеда Махачкъалада, Пушкинан куьчеда, адетдинди тушир мярекат — кулинариядин фестиваль-конкурс (“FoodStreetDag”-2022) ва ашпазрин международный I чемпионат кьиле фена. Ана неинки къецепатан уьлквейрай — Италиядай, Пакистандай, Маврикийдай, гьакIни Россиядин са шумуд региондай атанвай ва чи республикадин ресторанрин бизнесдин сагьибри (абурун кьадар 50-далай артух тир), тIвар-ван авай ашпазри тIуьнар гьазурунай чпин устадвал къалурна. Абуру ачух гьавадал гьазурай няметар шегьерэгьлийриз ва мугьманриз дадмишдай мумкинвал хьана…
Мярекатдиз талукьарна, “Дагъустан” РИА-дин конференц-залда кьиле фейи пресс-конференциядал адан тешкилатчийри — винидихъ тIвар кьунвай агентстводин регьбер — Мегьамед Мегьамедова, Махачкъаладин администрациядин культурадин управленидин начальник Фарид Абалаева ва тIуьнар гьазурунин искусстводин хилен векил, конкурсдин кьилин судья-координатор Махач Вагьабова къейд авурвал, Дагъустандин гьукуматдин куьмекни галаз тешкилай “FoodStreetDag -2022” фестиваль-конкурсдин макьсад республикада ресторанрин бизнесдин векилриз чпин тIуьнар къалурдай, абурухъ галаз “танишардай” майданар ачухун, кьилиндини, дуьньядин культураяр кулинариядин куьмекдалди сад авун, тIуьнрин чIалалди жуьреба-жуьре халкьарин адетар раижун тир.
Фарид Абалаеван гафаралди, ихьтин конкурс арадал гъун республикадиз эхиримжи вахтара иллаки гзаф туристар атунихъ галаз алакъалу я. Мадни ачухдаказ лагьайтIа, республикадин кулинария авай гьал чир жеда, адаз къимет гудай — мумкинвални. Идалайни гъейри, республикадиз Мишлендин гъетерин (ресторанриз гузвай виридалайни кьилин шабагь) сагьибар атуникай, тIуьнар гьазурунин рекье машгьурвал къазанмишнавай ксари мастер-классар гуникай республикадин шеф-ашпазриз менфят хкатда, абуруз чпин тежриба хкаждай мумкинвал жеда.
Зи фикирдалди, фестивалдин 3-югъ виридалайни рикIел аламукьдайди хьана. ИкI, 10 шеф-ашпазди и юкъуз чпин гьунарар къалурун — якIукай тIуь-нар (гриль) ва аш гьазурун лазим тир. Дагъларин уьлкведиз атанвай машгьур ашпазри — Мишлендин гъетерин сагьибри — республикадин продуктрин еридиз, кIвалахдин рекьяй юлдашрин пешекарвализни хъсан къимет гана. “ЯкIукай тIуьнар гьазурунал гьалтайла, кавказвийрихъ галаз къведайбур авач”, — къейдна абуру. Италиядай атанвай шеф-ашпаз Чезаре Кьюди пицца гьазурунай мастер-классни къалурна.
ИкI, якIукай тIуьнар гьазурунай, жюридин къарардалди (аник Россиядин кулинариядин Ассоциациядин регьберар Николай Баратов, Алла Мишина, Анна Жукова, Махач Вагьабов, Къумсият Мирзаева квай), Махачкъаладай (“Оттоман Палас”) ва Хасавюртдай (“Шатёр”), гьакIни Чечнядин меркез Грозный шегьердай (“Караван” ва “Кавказдин кухня”) ресторанрин ашпазар къизилдин медалриз лайихлу хьана. Аш гьазурунайни — “Шатёр” (Хасавюрт), “Караван” (Грозный) ва “Город” (Махачкъала) ресторанрин шеф-ашпазри гъалибвал къазанмишна.
Къейд авун лазим я хьи, фестивалдин 3 юкъузни (ам кьиле фейи йикъар гар ва марф авайбур хьунизни килиг тавуна) инсанри активвал къалурна — гьар юкъуз 100 агъзурдалай виниз ксари иштиракна. Са гафуналди, гьам ашпазар, гьамни фестивалдин иштиракчияр рази яз амукьна.
Рагнеда Рамалданова
