Махсус серенжем давамарзава
РФ-дин Яракьлу Къуватри Украинада военный махсус серенжем давамарзава. Идакай РФ-дин оборонадин министерстводин пресс-къуллугъди хабар гана.
6-апрелдин экуьнахъ ракетайрин куьмекдалди Радехов, Казатин, Просяная, Николаев ва Новомосковск районра авай кудай ва ягъламишдай затIарин вад база тергна. Къейднавай объектри Украинадин кьушунрин Харьковдин, Николаедин ва Донбассдин районра авай кIеретIрин военный техника кудай затIаралди таъминарзавай.
6-апрелдин экуьнахъ РФ-дин оборонадин министерстводи малумарай делилралди, махсус серенжем кьиле тухунив эге-чIайдалай инихъ чи кьушунри Украинадин 125 самолет ва 93 вертолет, зенитный ракетайрин 227 комплекс, пилот галачир 407 аппарат, 1981 танк ва дяведин маса машинар, РСЗО-дин 215 установка, артиллериядин ва маса 854 яракь, дяведин суьрсет, военный махсус 1882 автомобиль тергна.
Меслятдал татун патал
Россиядин МИД-дин кьил С.Лаврова гьисабзавайвал, Москвадинни Киевдин арада кьиле физвай рахунрин гьерекатдиз зарар хьун патал РагъакIидай патан уьлквейри къастуналди Бучада арадал атай мусибатдикай тапан делилар раижзава. Идакай “Новости” РИА-ди хабар гузва.
“Киевдин гьерекатриз регьбервал гузвайбуруз, чаз чизва абур вужар ятIа, гьар гьикI хьайитIани, Европадин хатасузвал ва ООН-дин уставдин къайдаяр вилив хуьнин жигьетдай жавабдарвал аннамишунин патахъай чаз, мад сеферда кIевелай истемишуналди, эвер гуз кIанзава”, — лагьана министрди.
Идалай вилик, 3-апрелдиз, Украинадин гьукумдарри ва къецепатан са жерге СМИ-ри Россиядин аскерри гуя Буча шегьерда ислягь агьалияр кьена лагьай малуматар чукIурнай. РФ-дин оборонадин министерстводи Украинадин терефди кутазвай тахсирар къалпбур ва и информация къалмакъал къизгъинарун патал чукIурзавайди къейднай.
Арза галачиз тайинарда
РФ-дин Гьукуматдин Председатель М.Мишустина малумарайвал, инвалидвилин пенсияр гила арза галачиз тайинарда. Адан гафар “ТАСС” чешмеди раижна.
Куьмек агакьна
“Новости” РИА-ди хабар гайивал, Ростовдин областдиз Донбассдай катай 83 агъзур касдив са сеферда гузвай 10 агъзур манат пул агакьна.
Чпиз фур эгъуьнна
РФ-дин Госдумадин Председатель В.Володина къейд авурвал, Вашингтондин план кьилиз акъатнач. “КIеви санкцийри кIвалахнач. Россиядин экономика кIудуникай, банкунин система тартибдикай хкудуникай фикирнавай. Кьиле фенач”, — кхьена В.Володина вичин Telegram-каналда.
Адан гафаралди, США-ди арадал гъанвай гьалари чпиз зарар гузва. Россиядин Президент В.Путина дуствилинбур тушир уьлквейри газдин гьакъи урус пулуналди гунин къарар кьабулуни США-дин финансрин министерстводик гъулгъула кутуна.
Ковиддикай
Энгельгардтан тIварцIихъ галай молекулайрин биологиядин институтдин алим П.Чумакован фикирдалди, исятда Россияда коронавирусдик начагъ жезвайбурун кьадар тIимил хьун давам жеда. Биологдин зенд “Лента.ру” чешмеди раижнава.
Алимдин гафаралди, чIехи пай россиявийривай алай вахтунда вирусдиз дурум гуз жезва: абур рапар ягъайбур ва, начагъ хьана, сагъ хъхьайбур я. Гьа са вахтунда азар акатзавайбурун кьадар артух хъхьун намумкин кар я лугьуз жедач. Биологдин фикирдалди, цIийи штамм пайда хьайила, 2-3 вацралай коронавирусди мадни са тIимил кьил хкажда. Им, къейдзавайвал, умуми иммунитет зайиф хьунихъ галаз алакъалу я. “Зи фикирдалди, идалай вилик коронавирусди акIажарайбур заландиз азарлу жедач”, — лагьанва Чумакова.
Эхиримжи йикъарин делилралди, дуьньяда коронавирус акатайбурун кьадар гзафни-гзаф, гьа виликдай хьиз, США-да ава. Адан гуьгъуьнал Бразилия, Индия, Россия, Мексика ала.
Эхиримжи гьафтеда чи уьлкведа гьар юкъуз вирус акатзавайбурун кьадар 20 агъзурдалай агъуз аватна. Кьилди къачуртIа, 6-апрелдиз Россияда коронавирус акатай 8328 кас винел акъудна. И делилри къалурзавайвал, азар чукIунин гьерекат хейлин яваш хьанва. Идахъ галаз алакъалу яз уьлкведин бязи регионри идалай вилик кардик кутур са жерге сергьятвилер, серенжемар къуватдай вегьенва.
Байденан гъалатI
Пентагондин виликан чиновник Д.Макгрегоран гафаралди, НАТО Россиядин сергьятрив агудун США-дин еке гъалатI хьана. Идакай ада “The American Conservative” чешмедиз акъудай макъалада лагьанва.
Къейдзавайвал, Байдена вичин гьерекатралди Евразиядин майданра Россиядин, Китайдин, Индиядин, Япониядин, Азиядин роль къуватлу ийизва.
«Лезги газет»
