КьетIивал къалуриз кIанзава

Россиядин МИД-дин кьил С. Лаврова къейд авурвал, Украинадин гьукумдарриз, Донбассда пилот галачир Bayraktar аппарат ишлемишуналди, чпин кьетIивал къалуриз кIанзава. Идакай “Новости” РИА-ди хабар гана.

С. Лаврован фикирдалди, пилот галачир Bayraktar аппаратдихъ галаз алакъалу агьвалат сирлуди, кьил акъат тийирди я. Украинадин яракьлу кьушунрин генеральный штабди пилот галачир аппарат сифте яз 26-октябрдиз женгера кардик кутуна лагьай хабар раижнай.

Донбассдикай рахана

Украинадинни США-дин президентри Глазгода кьиле фейи саммитдал Донбассдин гьаларни веревирдна. Идакай В.Зеленскийди Twitter-да малумарна.

Зеленскийдин гафаралди, Байденахъ галаз Донбассда хатасузвал хуьнин месэладай ихтилатна. Къейдзавайвал, США-дин регьбер Байдена Украинадин мулкарин битаввилин ва ана кьиле физвай дегишвилерин тереф хуьн давамарда.

Коронавирусдикай

Медицинадин илимрин кандидат, иммунолог Н. Крючкован фикирдалди, коронавирусдин “мю” ва “лямбда” штаммар Россия­да “дельта” хьиз чкIидач, вучиз лагьайтIа абур Индиядин штамм­дилай зайиф я. Адан гафар “Известия” чешмеди раижзава.

Пешекардин гафаралди, Россияда дуьздал акъуднавай кьве штамм сифтедай Перудани Колумбияда чкIанвай, амма вири дуьньяда “мю” ва “лямбда” штаммар акатнавай дуьшуьшрин кьа­дар екеди туш.

Ковиддин цIийи штаммар Россияда пайда хьанвайдакай 1-ноябрдиз Роспотребнадзорди малумарнай. Къейдзавайвал, вири­далайни хаталу ва гегьеншдиз чкIанвай штамм “дельта” я.  Эхиримжи йикъарин делилралди, дуьньяда коронавирус акатнавайбурун умуми кьадар 248 миллиондив агакьзава, саки 224 миллион кьван ксар сагъ хъхьана. Дуьньяда коронавирусдик 5 миллиондилайни гзаф ксар кьена.

Россияда коронавирус акатнавайбурун кьадар 8 миллионни зуралай алатнава. Ирид миллионни зур кьван ксар сагъ хъхьана, кьейибурун кьадар 241 агъзурдалай алатнава. Роспотребнадзордин кьил А.Поповади малумарайвал, коронавирусдикди начагъбур уьлкведин гзаф регионра артух жезва. Адан фикирдалди, гьалар яваш хъхьун патал гьафтедилайни гзаф вахт герек жеда.

Яхунардай няметар

Америкадин духтурри-пегьризчийри меслят къалурзавайвал, яхун жез кIанзавайбуру авокадо, ичер, брокколи ва чиа тIуьн герек я. Неинки яхун хьунин, гьакI тIуьр няметар иливарунин жигьет­дайни и затIари хийир гуда. Пешекаррин фикирар “She Finds” чешмеди раижнава.

Идалай вилик Америкадин алимри яхун жез куьмекдай зулун­ майвайрикай лап хъсанбур буранни келем я лагьанай.

Кьве экран алай ноутбук

“Lenovo” компанияди кьве экран алай цIийи жуьредин ноутбук арадал гъидайвал я. Тешкилатдин векилдин малумат “Лента.ру” чешмеди раижнава.

Къейдзавайвал, цIийи моделдихъ 17 дюймдин асул дисплей­ди­лай гъейри кьвед лагьайдини жеда. Кьвед лагьай экран клавиатурадин эрчIи пата тайинардайвал я. Ам сенсор хьиз ишлемишиз хьун мумкин я. ТуькIуьрзавайбуру гьелелиг тамам делилар малумарзавач. Пешекаррин фикирдалди, кьвед лагьай экран алава информа­ция патал я. ЦIийи компьютер 2022-йисуз пайда хьун вилив хуьзва­.

Къуватдай вегьин теклифна

США-да авай Россиядин векил А. Антонова а уьлкведин гьукумдарриз сада муькуьдаз акси яз малумарнавай серенжемар къуватдай вегьин теклифна. Идакай “Новости” РИА-ди хабар гузва.

Америкадинни Россиядин алакъаяр 2021-йисан апрелдилай инихъ пайгардикай хкатна. А чIавуз Вашингтонди Москвадиз акси цIийи санкцияр кардик кутунай. Кьилди къачуртIа, сергьят эцигай серенжемар 30-далайни гзаф кьилдин ксариз ва тешкилатриз талукь хьана. Абур кардик кутунин асул себеб, Вашингтондин терефдин фикирдалди, гуя Россия США-дин сечкийрик къаришмиш хьунихъ галаз алакъалу я.

Гуьгъуьнлай кьве терефдини уьлквейра кардик квай векилханайра къуллугъчийрин кьадар тIимиларнай.

Кьил къакъудзава

Даниядин премьер-министр М. Фредериксена, уьлкведа энергетикадин жигьетдай авай кризисдизни килиг тавуна, “Северный поток-2” газдин проводдин тереф хуьдач лагьана. Адан гафар “ТАСС” чешмеди раижнава.

Къейднавайвал, виликдай хьиз, исятдани Дания “Северный поток-2” проектдиз акси экъечIзава. “Энергетикадин патахъай дарда аватIани, чна фикир дегишарнавач. Эхь, сифтедай чна “Северный поток-2”газопровод тухудай ихтияр ганай, амма ам техникадихъ галаз алакъалу кар тир”, — лагьана Даниядин гьукумдарди.

«Лезги газет»