27-октябрдиз Агъа СтIалдал, Дагъустандин халкьдин шаир СтIал Сулейманан музейда, лезги чIалал XX асирдин Гомеран шиирар кIелунай малумарай конкурсдин гъалибчийрив савкьатар вахкуниз талукьарнавай мярекат кьиле фена. Ана райондин кьил Нариман Абдулмуталибова, адан сад ла­гьай­ заместитель Лацис Оружева, образованидин управленидин начальник Гьуьсен Шихбабаева, Дагъустандин писателрин Союздин лезги секциядин регьбер Владик Батманова, лезги чIалан муаллимри ва масабуру иштиракна.

Лагьана кIанда, конкурс тешкилайди ва адаз пулдин такьатар чара авурди Москвада яшамиш жезвай ахцегьви, мергьяматлувилин гзаф крарик кьил кутазвай меценат Нариман Гъазалиев я. РикIел хкин, адан куьмекдалди алай йисан гатуз Ахцегь районда СКФО-дин дережада аваз футболдай чIехи турнирни кьиле фенай.

Асул гьисабдай мектебра кIелзавай аялрин арада тешкилай и конкурс Ахцегь райондин Гъуьгъвезрин хуьруьн мектебдин Инстаграмда авай аккаунтда кьиле фена. Иштиракчийри и аккаунтдиз шиир кIелзавай къайда лентиниз къачуна, 1 декьикьадилай артух да­вам тежезвай видеороликар ракъурна кIан­завай. Гьар са видеоролик, виридаз аквадайвал, аккаунтда эцигнавай. И кардин ва конкурс хъсан дережада аваз кьиле тухунин жавабдарвал Гъуьгъвезрин хуьруьн мектебдин директордин заместитель Исамедин Шагьэмирова вичин хивез къачунвай.

Санлай къачурла, конкурсда 300 аялди иш­тиракна. Абурун арада Ахцегь, Докъуз­пара­, Мегьарамдхуьруьн, СтIал Сулейманан, Хив, Кьурагь, Дербент районрин, Каспийск, Ма­хач­къала, Дербент, Дагъустандин Огни, Москва, Санкт-Петербург ва са жерге маса шегьеррин мектебра кIелзавай аялри иштиракна.

Конкурсдин нетижада 1-чкадиз — Дербент райондин Белиж поселокдин 4-нумрадин мектебдин ученица Кевсер Абдулкеримова, 2-чкадиз — Мегьарамдхуьруьн райондин Ярагъ-Къазмайрин мектебдин ученица Халида Эфендиева ва 3-чкадиз Бут-Къазмайрин мектебдин ученица Камила Салманова ла­йихлу хьана. Абурув дипломар  ва 30, 20, 10 агъзур манатдин кьадарда аваз пулдин пишкешар вахкана.

Конкурсдин тешкилатчидин къарардалди, хъсандиз шиирар кIелай мад 20 аялдиз дипло­­марни 1 агъзур манатдин кьадарда аваз пул­дин пишкешар гана. Амай вири аялриз кон­курс­да иштиракунай махсус сертификатар гана.

Къейд ийин хьи, аялри шиирар кIелай къай­дадиз къимет гайибурун арада “Лезги газетдин” кьилин редактор, шаир Мегьамед Иб­ра­гьимов (ам жюридин председатель тир), Да­гъустандин писателрин Союздин лезги писателрин секциядин регьбер, шаир Владик­ Батманов ва Гъуьгъвезрин хуьруьн мектебдин лезги чIалан муаллим Юсуф Муслимов авай.

Гъалибчийрив пишкешар вахкудайла Нариман Абдулмуталибова къейд авурвал, ихьтин мярекатар тухунихъ хайи чIал хуьнин карда еке метлеб ава. Абурун куьмекдалди акьалтзавай несилар милли ивирриз мадни мукьва ийиз, алакьунар авайбур винел акъудиз, абурук руьгь кутаз жезва. Райондин кьили конкурс тешкилай Нариман Гъазалиеваз сагърай лагьана.

Исамедин Шагьэмирован фикирдалди, и конкурс республикадин образованидин хиле чIехи проектрикай сад яз гьисабиз жеда. И кардин гьакъиндай 300-дав агакьна аялри иш­тиракуни шагьидвалзава. Адан гафаралди­, Нариман Гъазалиевахъ инлай кьулухъни ихьтин проектрик къуьн кутадай ниятар ава.

Агьмед  Магьмудов