Еке магълубвал
Белоруссиядин президент А. Лукашенкоди Афгъанистанда кьиле физвай гьерекатар рагъакIидай патан еке магълубвал яз гьисабзава. Адан зенд “Пул Первого” Telegram-каналди раижна.
Ада къейд авурвал, Вашингтонди Афгъанистанда гьалар кьасухдай пайгарсуз авунваз хьун мумкин я.
Бязи чешмейри къейдзавайвал, Афгъанистан себеб яз, США-дин президентдин дережа агъуз аватнава.
Саки туьхуьрнава
Уьлкведин МЧС-ди малумарайвал, Якутияда цIаяр кьунихъ галаз алакъалу агьвалатар тамамдаказ гуьзчивилик кутунва. ЦIай къизгъин жезвай асул чкаяр михьиз туьхуьрнава. Идан гьакъиндай Россиядин МЧС-дин кьилин заместитель В.Яцуценкоди “ТАСС” чешмедиз хабар гана.
Алай вахтунда инсанар яшамиш жезвай чкайрал гум акьалтунин, агьалийриз зарар хьунин къурхулувал амач.
Тамара еке майданра цIаяр кьунар июндин эхирра арадал атанай. Якутияда цIу кьур тамун майданри 7 миллион гектар тешкилна.
Алай вахтунда Самарадин областда тамар кун давам жезва.
Гьалаллудаказ ял ядай чка
Москвадин сергьятра мусурманар патал мискIин ва ял ядай гьалаллу база авай махсус поселок арадал гъидайвал я. Чилин участокдин къимет 430 агъзур манатдилай башламишзава. Поселок эцигуник кьил кутунвайда тестикьарзавайвал, чилин участок вири миллетрин векилривай маса къачуз жеда.
Чапхунунар ва басрухар
“Талибан” (Россияда къадагъа авунва) тешкилатдин боевикри Америкадин са шумуд самолет, вертолет ва ракета чапхунна. Идакай “Новости” РИА-ди хабар гузва.
Арадал атай агьвалатди США-дин яракьлу къуватрин къурулушдик къалабулух кутунва, амма боевикри къакъудай техника гьелелиг тергдай фикир авач.
“Боевикриз вертолетарни самолетар ишлемишун четин акъвазун мумкин я, гьикI хьи, абурухъ пилотар авач, техникадин рекьяй авуна кIани къуллугъдикайни магьрум я”, — малумарзава чешмеди.
Кабулдин аэропорт Америкадин кьушунри гуьзчивилик кутунва ва ам США-дин агьалияр ва амадагар ахкъудун патал ишлемишзава. Аэропортуна, яракьар ишлемишуналди арадал къвезвай къал-къиж ва басрухар себеб яз, 20 кас кьван кьена.
Къейд ийин, чи уьлкведа къадагъа тир “Талибан” тешкилатдин боевикри, Панджшере вилаят квачиз, Афгъанистан саки михьиз чпин гуьзчивилик кутунва. 22-августдиз талибри Панджшереда чпихъ галаз женг тухузвайбуруз муьтIуьгъ хьуниз эвер гана. Вилаятдивай талибриз акси женг тухуз тежедайдакай, абур муьтIуьгъ жез гьазур тирдакай 24-августдиз малум хьана.
Хатасузвилин дестек
Эрменистандин премьер-министр Н.Пашиняна Россиядихъ галаз авай амадагвал уьлкве патал хатасузвилин са дестек я лагьана.
Бязи теклифар
РФ-дин здравоохраненидин министерстводи ВИЧ квай ксар патал “Спутник V” вакцинадин рапар ягъунин жигьетдай бязи теклифар гана. Къейдзавайвал, ихьтин начагъбуруз абур сагъарунин гьерекатар кьилиз акъудайдалай кьулухъ кьуд гьафте алатайла, ахпа “Спутник V” вакцинадин рапар ядай ихтияр ава. Идан гьакъиндай Россиядин здравоохраненидин министерстводин сайтда кхьенва.
Чешмеда раижнавай малуматрал асаслу яз, иммунитетдин дережадилай ва вирусдин парцелай аслу тушиз, ВИЧ квайбуруз “Вектор” центради арадал гъанвай вакцинадин рапар ягъайтIа жезва.
Кьуд лагьай лепе
Гуржистанда коронавирусдин тIугъвалдин кьуд лагьай лепе лап къизгъинди хьанва. Ихьтин фикир профессор И.Чхаидзеди “Sputnik Грузия” Telegram-каналдиз раижна.
Адан гафаралди, тIугъвалдин гьалар пис хьун коронавирусдин “Дельта” жуьредихъ галаз алакъалу я. “Вирусдин Китайдин ва Британиядин жуьрейрилай тафаватлу яз, гила пайда хьанвайди гзаф хаталу я, залан гьалда начагъбурун, рекьизвайбурун кьадар хейлин артух я”, — лагьана ада.
КIвалер ужуз шегьерар
Пешекаррин делилрал асаслу яз, “Известия” чешмеди раижнавайвал, Россияда виридалайни ужуз къиметдай кIвалер маса гузвай шегьеррин арада сад лагьай чкадал Омск ала, кьвед ва пуд лагьай чкайрал — Волгоградни Челябинск. Яшамиш жедай кIвалер ужуз чкайрик Новосибирск ва Воронеж шегьерарни акатзава.
Москвадани Санкт-Петербургда кIвалер виридалайни багьа я. Идалай вилик малумарайвал, Россияда яшамиш жедай кIвалералди са бубат таъмин тир шегьеррик Краснодар акатзава — ина гьар са агьалидал 38 м2 гьалтзава, Москвада — 19,8 м2, Махачкъалада — 18,2 м2.
«Лезги газет»
