1 миллиард манат ракъурда
РФ-дин Гьукуматди яшайишдин газификациядин программа уьмуьрдиз кечирмишунин кIвалах давамарзава. ИкI, 2024-йисуз чпиз яшайишдин рекьяй тайин кьезилвилер (льготы) талукь тир агьалийрин кIвалер газдин сетрик кутун патал федеральный бюджетдай алава яз 1 миллиард манат пулдин такьатар ракъурда. Идакай гьукуматдин сайтда хабар гузва.
Чешмеди къейдзавайвал, пулдин такьатар 57 регионди къачуда. И серенжемдин куьмекдалди программадин иштиракчийриз тадаракар къачуниз ва кIвал газдин сетрик кутуниз талукь кIвалахар кьиле тухун патал субсидияр гуда. Хабар гузвайвал, куьмек яз гузвай пулдин такьатрин кьадар агъа кIан 100 агъзур манатдиз барабар жеда.
Уьлкведин премьер-министр Михаил Мишустина рикIел хкайвал, яшайишдин газификациядин программадив 2021-йисуз гатIуннай. 2023-йисан февралдилай гьукуматди чпиз яшайишдин рекьяй тайин кьезилвилер (льготы) талукь агьалийриз абуру газ участокдал гъунин ва ам кIвалик кутунин серенжемриз ийизвай харжийрин са кьадар пай субсидияр хьиз гузва.
ГьакIни хабар гузвайвал, и программа уьмуьрдиз кечирмишиз эгечIайдалай инихъ зур миллиондилай виниз кьилдин кIвалер газдик кутунва.
ЦIийи дарманар
Уьлкведин фармацевтикадин хиле цIийи жуьредин (инновационный) продукция арадал гъиз эгечIнава. ИкI, алатай йисуз Урусатда тахминан 540 дарман регистрация авунва. Идакай, РФ-дин здравоохраненидин министр Михаил Мурашкодин гафарал асаслу яз, ведомстводин телеграм-каналди хабар гузва.
Чиновникди къейдзавайвал, кьилди къачуртIа, 2023-йисуз уьлкведа регистрация авунвай 540 дармандикай анжах 160 къецепатан уьлквейринбур я. Гьа са вахтунда алатай йисуз Урусатда 8 кархана ачухна. ГьакIни, министрдин гафарай малум хьайивал, шаз базардиз 6 миллиард упаковкадив агакьна дарманар акъатнава, абурун умуми гьисабдикай 70 процент чкадинбур я.
Вилериз экв хкана
М.Ф.Владимирскийдин тIварунихъ галай МОНИКИ-дин (Москвадин областдин илимдинни ахтармишунрин клинический институт) духтурри 67 йисан яшда авай агьалидин вилерин экв 1 процентдилай 40 процентдал кьван хкаж хъувуна. Идакай РФ-дин здравоохраненидин министерстводин телеграм-каналди хабар гузва.
Чешмеди къейдзавайвал, вилерин экв саки квахьнавай агьали Бехтереван уьзуьрдикдини начагъ тир. И кар себеб яз, операция авун са кьадар четинни хьана. Хабар гузвайвал, пешекарриз арза ийиз атай кас ахтармишайла, адахъ катаракта авайди тайин хьана.
Клинический институтдин офтальмологиядин отделенидин заведующийди къейдзавайвал, начагъ касдиз факоэмульсификациядин къайдада лап тIимил хасаратвал жедай жуьредин операция авуна. Махсус ультрасесинин алатдин куьмекдалди рагъул хьанвай хрусталик (вилин шуьше хьиз аквадай пай) куьлуь-куьлуь авуна, адан чкадал гуьгъуьнлай тIебии тушир хрусталик эхциг хъувуна.
Къейдзавайвал, алай девирдин къайдада кьиле тухвай сагъламвал мягькем хъувунин и серенжемдин куьмекдалди са гъвечIи муддатда агьалидин эрчIи патан вилин экв, винидихъ къейднавайвал, 1 процентдилай 40 процентдал кьван арадал хкиз алакьна.
ГьакIни чешмеди кхьизвайвал, виликдай и агьалидиз медицинадин маса идарада чапла вилин экв арадал хкун патал операция кьиле тухванвайди тир.
Телеграм-каналди гъизвай делилралди, алай вахтунда агьалиди вич хъсандиз гьиссзава, ам кIвализ аххъайнава ва офтальмологдинни ревматологдин гуьзчивилик ква.
Гьазурайди – Муса Агьмедов
