Жуван кьил хуьн ва гьакIни халкьдиз жувакай менфят хкатун патал чун гьар са кас са пешедин иеси хьун герек я. Пешеяр лагьайтIа, кьуьк ядай кьванбур ава. Алай вахтунда мехъеррик, суварриз, шадвилин вири межлисра — хайи югъ, хизан артух хьун, уьмуьрда са гьихьтин ятIани агалкьун къейдзавай мярекатра — суфраяр туькIуьрун анжах са хуьрекралди дуьзмишуналди сергьятламиш жезвач. Технологияр артмиш жезвай девирда и хилен «искусствони» вилик фенва. Алай девирда ширинлухар — торт, чранвай шейэр ва я маса затIар алачир межлисдин суфра фикирдиз гъун четин я. Заз чиз, ширинлухар такIан кас дуьньядал жеч. Абур алачир суфра кукIва жедай гъед галачир ёлкадиз ва я варз алачир цава авай гъетериз ухшар я. Гьавиляй ширинлухар дуьзмишнавай суфрадин «шагь», и «шагьдин» устIарарни, гьелбетда, кондитерар я. Зи ихтилатни гьа ихьтин са устаддикай, кондитер Хидирнабиева Наиятакай фида.
Каспийск шегьердин «Пригородный» куьчедай физвай гьар са касдин ягъай вил гуьрчег рангаралди, вилик ишигъ тухудай хьтин нур гузвай «Кондитерская Марципан» кхьенвай кьулуна акьада. Гьа и «маканда» зун Наиятахъ галаз таниш хьана. Къецел патай цларал янавай гуьрчег рангаралди чIугунвай десертринни чранвай ширинлухрин шикилри ва кондитерскийдин къене пата гьар са затI хъсандиз аквазвай витринадин дезгедал эцигнавай суьрсетди ам лап гьа выставкадиз барабар авунва. Шикилар, гьелбетда, живописдин гьунар я, амма витринадин дезгейрал алай кьван тортарин, десертрин суьретар «чIугунвай» Наият художник туш гьикI лугьуда? Художник анихъ амукьрай, скульпторни тушни мегер! Махарик квай хьтин къушарин, гьайванрин, гьар жуьредин цуькверин статуэткаяр арадал гъунин гьайбатрикай за Наиятавай са кьве гаф лугьун тIалабна.
— Гьеле школада гъвечIи классра амаз, — башламишна ада, — пластилиндикай гьайванрин, къушарин кIалубар туькIуьрун зи рикI алай кIвалах тир. ЧIехи хьайила, пластилиндив къугъваз жедач кьван, — хъуьрена хьиз, давамарна ада, — гьа ихьтин кIалубар тинидикай ийиз, чраз эгечIна зун. Ахпа — тIунутIар, шуьреяр, цикIенар… Жуван рикI алай пеше генани вини дережадиз акъудун патал зун Туьркменистандин Небит-Дагъ шегьерда авай алишверишдин училищедиз гьахьна. Кондитердин кьилин везифа инсандин уьмуьр «тIямлу» авун я. И рекьяйни гьар са устаддихъ вичин рецептура, «къайда» ава. Кьилинди ширинлухар чрун патал гьазурзавай къаришма устадвилелди гьазурун я. Эгер ам гьазурзавай няметрикай са затI артух ва я эксик хьайитIа, на чIугур зегьметдихъ тарифдай нетижа жедач. Гьавиляй и карди чирвал, гъавурда аваз ва гьакIни мукъаятвилелди эгечIун истемишзава. Идалайни гъейри, кьилин шартIарикай мадни сад жува чразвай, я туькIуьрзавай тортунин шикил хиялда, фикирда чIугваз алакьуникай ибарат я. Имни анжах кьатIунрин бажарагъвал авай касдилай алакьда. Хиялда туькIуьрзавай, чразвай тортунин шикил чIугун, ахпа гьа шикилдай статуэтка «хрун» анжах гьевесдал, ашкъидал бинеламиш жезвайди я.
Наиятан суьгьбетдай зун гъавурда акьурвал, кондитервилин искусство, гуьрчег ва тIямлу ширинлухар гьазурунилай гъейри, са гьихьтин ятIани кьетIенвилер, артуханвилер авай пеше я. И пешеди кьуру хиялдиз (фантазиядиз) яратмишзавай затIунин суьрет гъиз алакьун ва ахпа ам гьар жуьредин кIалубралди, рангаралди гуьрчегарни хъувун истемишзава. Шаксуз, яратмишунин бажарагъвал хьиз, им технологиядин чирвилерни истемишзавай пеше я. Кондитерди яратмишзавай «эсерар» арадал къведалди ийизвай кIвалахрин чIехи пай гъилелди, махсус алатралди тамамарзава. Гьавиляй и пеше гьа са вахтунда художникдин, скульптордин, технологдин пешейрихъ галаз барабарзава. Эгер художникди арадал гъизвай шикил рангаралдини кистдин куьмекдалди арадал гъизватIа, кондитерди — кремралдини и пешекаррин «чIехи яракь» тир шприцралди…
Ихьтин алакьунар авай, хъуьрез акъвазнавай, лугьудайвал, чина берекатдин нур авай чи лезги рушан уьмуьрдикайни талгьана жедач.
Хидирнабиева (Агьмадова) Наият 1971-йисуз Мегьарамдхуьруьн райондин Уружбайрин хуьре тракторист Рамазананни Рамзиятан хизанда дидедиз хьана. 1986-йисуз 8-класс куьтягьай ам, чна винидихъни къейднавайвал, Небит-Дагъ шегьердин алишверишдин училищедин кондитервилин отделенидиз гьахьна. Кьисметди Наият сифте 1989-йисуз — Астрахандиз, ахпа 1999-йисуз — Нижневартовскдиз, 2022-йисузни Каспийскдиз акъудна. ИкI, алатнавай 35 йисуз, гьина хьанатIани, чи ватанэгьлиди, инсанрин уьмуьр «ширинариз», кондитервиле кIвалахна.
Н.Хидирнабиева вафалу уьмуьрдин юлдаш, мегьрибан дидени я. ЧIехи кьве рушахъ чпин хизанар, кIвал-югъ хьанва. Гада Артем Каспийск шегьердин медколледждин 2-курсунин студент я.
Наият, къуй гьамиша ваз рагъ «хъуьруьрай», гьа ракъинин нурарик ви устадвили цуьк ахъайрай, цуькведин атирдини миллионралди инсанрин иштагьар ачухаррай. Вахъ чандин сагъвал, хизанда мадни хушбахтвал, дуьньяни ислягь хьурай!
Фазила Абасова
