Кьенятиз эгечIнава

Уьлкведин агьалияр чпин машинриз техникадин жигьетдай къуллугъ авун патал мукьвал-мукьвал «гараждин сервисриз» физва. СТО-дин чIехи сетрикай анжах 30 процент шоферри менфят къачузва, эхиримжи пуд йисуз лагьайтIа, офици­альный сервисривай къерех хъжезвай муьштерийрин кьадар 7 процентдиз барабар я. Идакай «Известия» изданидиз Fit Service автосервисрин сетди ва аналитикадин Gruzdev-Analyze агентстводи суьгьбетна.

Gruzdev-Analyze агентстводин кьил Алек­сандр Груздева къейд авурвал, официальный сервисриз фин тийиз, «гараждин карханайриз» финин себеб ам я хьи, инсанриз кьенят ийиз кIанзава. Шоферри запчастар чпи къачузва ва абур виридалайни ужузбур жагъуриз алахъзава, ахпа хсуси «мастерскойриз» физва, герек къачунвай запчасть ужуз къиметдай эхцигдайвал.

Ада алава хъувурвал, и карди анжах шартIунин кьенятвал арадал гъизва, гьикI лагьайтIа, маса къачузвай запчастдин ва адаз къуллугъ авунин еридин жавабдарвал машиндин иесиди вичин хивез къачузва.

Автомобилрин милли союздин вице-президент Ян Хайцера изданидиз къейд авурвал, бзяи вахтара контрафактдинни оригиналдин арада авай къиметдин тафават са шумуд цIуд агъзур манатдиз барабар жезва.

Къиметар хкаж хьанва

Яндексда «Метягьар» («Товары») раз­делдин статистикади къалурзавайвал, уьлкведа юкьван гьисабдалди яша­йиш­да ишлемишзавай техникадин ва электроникадин къиметар 10 процентдин хкаж хьанва. Идакай «Известияди» хабар гузва, кхьизва «Газета.ру» чешмеди.

Сервисдин делилралди, къапар чуьхуьдай Bosch SMV24AX00E машиндин къимет июлдин сифте кьилелай инихъ августдин эвел кьилералди 16, 8 процентдин хкаж хьанва, яни 39, 9 агъзур манатдал кьван.

Юкьван гьисабдалди HP Neverstop Laser 1000a принтердин къимет тахминан­ 10 процентдин хкаж хьанва. Гила и техника 23, 5 агъзур манатдай маса гузва.

ГьакIни, СМИ-дин делилралди, Sam­sung­ Galaxy Z Flip4 смартфондин къимет са­ки 47 процентдин хкаж хьанва – и гаджет­ алай вахтунда 89, 8 агъзурдай хьиз маса гузва.

DiHouse компаниядин ведущий про­дакт-менеджер Алексей Мазева къейд авурвал, электроникаяр ва бытовой техникаяр уьлкведин базардиз параллелдин импортдин сергьятра аваз къвезвайди я. И кардихъ галаз алакъалу яз, абурун къиметар валютадин курсунилай аслу жезва.

Гьикьван яд ­хъвада?

«СМ-Клиникадин» духтур-терапевт, дух­­тур-диетолог Елена Тихомировади­ «Из­­вестия» изданидихъ галаз кьиле тух­­вай суьгьбетда къейд авурвал, яд хъунин­ тамам тир режим авайди туш, вучиз ла­гьайтIа, и делил гьар са касдиз хсусидаказ талукьди ва са жерге крарилай аслуди я.

Духтурди къейд авурвал, зегьем вахтунда инсан гьекь гзаф жезва, нетижада­ бедендик квай кьеж квахьзава, ам арадал­ хкун лазим я. Ихьтин зегьем вахтунда 30 килограмм бедендин заланвилиз лап тIи­мил 1 литр яд герек я. Эгер ам бес кьадар­да тахьайтIа, и делилди вири бедендиз таъсирда. Сифте нубатда иви икьи жеда ва и карди рикIинни дамаррин сагъламвал пайгарсуз хьунин къурхулувал артухарда.

Тихомировадин гафаралди, къарихвал кьин патал адетдин, минеральный ва я тахьайтIа лимон квай яд, векьерин чаяр хъун виридалайни гзаф кутугнава. Гьа са вахтунда чIулав ва къацу чаярилай бедендикай хкатнавай кьеж тамамдаказ арадал хкиз алакьзавач, амма абур адетдин режимда аваз хъваз жеда.

Ширин, газ квай ва маса мижеяр хъун ерли кутугнавач. Абурук гзаф кьадар шекер ква, и делилди зегьем вахтунда гьал писарун мумкин я.

Эхирдай духтурди къейд авурвал, са гьихьтин ятIани начагъвилер авай чIавуз инсанди вичи лап вини кьил гьикьван яд кьабулун лазим ятIа, духтурдихъ галаз меслят авун хъсан я.

РикIел хкин, виликдай «Известия» изданидиз духтур-кардиолог, медицинадин илимрин кандидат Светлана Бязровади суьгьбет авурвал, гад алукьайла ва зегьем йикъар атайла, рикIинни дамаррин татугай гьалар (гипертонический криз, рикIин аритмиядин приступ, инфаркт миокарда, кьилин мефтIедин инсульт) пайда хьунин къурхулувал артух жезва. И кардихъ галаз алакъалу яз, ада агьалийриз йикъан лап зегьем вахтунда хъсан гьава къекъвезвай утагъда хьун ва общественный улакьдивай жезмай кьван кьил къакъудун меслят къалурна.

Къурхудик квайди раижнава

Роскомнадзорди, августдин эвел кьилелай эгечIна, алакъадин операторривай абонентрин гьакъикъи тушир хсуси делилар авай номерар агал авун (блокировать) истемишзава. Идакай «Ведомости» изданидиз алакъадин кьве компанияда ихтилат авуна.  Компаниядин регулятордивай номеррин сиягь къачур пуд йикъан къене абонент хабардар авун лазим я. Абонентди вичин нубатда ахпа 15 йикъан къене я «Госуслуги» порталда, я оператордин приложенида, я алакъадин салонда вичикай хсуси делилар актуализировать авун лазим я. ТахьайтIа, адан номер агалда.

Ихьтин кардикай Telecom Daily агентстводин генеральный директордизни малум я. Адан делилралди, операторри алай вахтунда абонентриз «хабар гунин телер» (уведомление) ракъурзава, абуру чпин паспортдин делилар тестикь авун ва и кардалди номер агал авуникай хуьн патал.

Изданиди къейдзавайвал, къурхудик квайбур корпоративный номерар ва гъиляй къачунвай сим-картаяр я.

Августдилай ­акъудда

АВТОВАЗ-ди алай йисан августдин вацра LADA Largus автомобилар акъудунин­ кIвалах цIийи кьилелай кардик кухтун планламишнава. Идакай ТАСС-диз компаниядин президент Максим Соколова хабар гана, кхьизва аналитикадин «Автостат» агентстводи.

Ада къейд авурвал, ихтилат 635 автомобилдикай ибарат партиядикай физва, аник (яни а партиядик) e-Largus электромобилар акъудун патал герек тир машинокомплектарни акатзава.

Копманиядин президентди гьакIни суьгьбет авурвал, и модель датIана акъу­­ду­нин месэладин гьакъиндай гьелелиг тайинвал авач, вучиз лагьайтIа, Largus акъу­дун патал агъзурдалай виниз жуьреба-жуьре компонентар къецепатай гъизва. Амма абур агакьарзавайбуру и кIвалах акъвазарнава.

Гьазурайди – Муса Агьмедов