Урусатда арадал гъанвай, инсандик квай азаррин лап гъвечIи чешмеярни кваз винел акъудиз жезвай сад лагьай маммограф Каспийск шегьердин кьилин духтурханада кардик кутунва. Надир мумкинвилер авай и аппарат чи уьлкведин алимрин зегьметдин нетижа я.
Каспийскдин ЦГБ-дин кьилин духтур Расим Рамазанова къейд авурвал, медицинадин хиле гзаф виже къвезвай, уьлкведа сад лагьайди тир, томосинтездал таъмин рекъемрин маммографди рентгендин лап хъсан еридин шикилар акъуддай мумкинвал гузва. Мисал яз, адан куьмекдалди некIедин железайрик рак уьзуьр кваз хьайитIа, ам лап фадамаз тайинариз жезва.
И аппаратди, инсандин беден ахтармишдайла, лап тIимил ишигъ (излучение) чукIурзава ва рентген ийизвай органдин сагъламвилиз артух зиян жезвач. Рентгендин таъсир тIимил хьуни дишегьлийриз ахтармишунин серенжем вахт-вахтунда кьиле тухудай мумкинвал гуда. Гьа са вахтунда ихьтин хъсан ери авай техника ишлемишуникди диагностикади “къалп диагнозар” тайинардай дуьшуьшарни тIимил жеда.
«Лезги газет»
