Дагъустандин балугъчийриз гьукуматдин патай саки 40 миллиондив агакьна пулдин куьмекар гуда. РД-дин балугърин майишатдин комитетдин пресс-къуллугъди хабар гузвайвал, 2022-йисуз чпи авур харжийрин са кьадар пай эвез хъувун патал ихьтин куьмек балугъчивилел машгъул жезвай 15 карханади къачуна. Куьмекдин кьадар, санлай къачурла, 38,2 миллион манатдиз барабар хьана. Гьа и кьадарда аваз пулдин куьмек балугъчивилел машгъул жезвай карханайрив цIинин йисузни агакьарда.

РикIел хкин, алай вахтунда гьавизрин майишатрин майданар, санлай къачурла, 12,1 агъзур гектардиз барабар я. Макъалада къейд ийизвайвал, алатай йисуз 5,897 агъзур тонндив агакьна балугъар  чIехи авунва (абурун арадай яз, карп — 895 тонн, лацу амур — 1, 257 агъзур тонн, толстолобик — 2, 078 агъзур тонн).

Чи мухбир