12-мартдиз Махачкъалада, Урусрин драмтеатрда, Россиядин уголовно-исполнительный къурулушдин (УИС) 145 йис тамам хьуниз талукьарнавай шад мярекатда Дагъустандин Гьукуматдин Председателдин заместитель Рамазан Жафаровани иштиракна. Анал республикадин УИС-да зегьмет чIугвазвай 10-далай виниз ксарив шабагьар вахкана. Гуьгъуьнлай концертдин еке программа къалурна.
Лишанлу вакъиадихъ галаз алакъалу яз, РФ-дин Президент В.Путина, Россиядин ФСИН-дин директор Аркадий Гостева — тебрикдин чарар, международный космический станциядай космонавт, Россиядин Игит Олег Кононенкоди, Роскосмосдин космонавтар тир Николай Чуба ва Константин Борисова УИС-да зегьмет чIугвазвайбуруз ва ветеранриз сувар тебрикнавай видео рекье тунвай.
«ФСИН-дин вилик акъвазнавай везифайрин важиблувили къуллугъчийривай пешекарвилин виниз тир ерияр, принципрал кIевивал, низам-къайдадал амал авун истемишзава. Квелай, куьне чIугвазвай намуслу зегьметдилай уьлкведа закон ва къайда хуьн, гьар са касдин хатасузвал таъминарун аслу жезва.
Къейд ийиз кIанзава хьи, эхиримжи йисара УИС-да тахсиркарвилер авунвайбурун ихтиярар хуьнихъ, дуьз рекьел хкидай идарайрин материально-технический база ва яшайишдинни дуланажагъдин шартIар хъсанарунихъ элкъуьрна, еке дегишвилер кьиле фенва. Азадвиликай магьрум тавуна, жаза гунин институтдикай яваш-яваш менфят къачузва.
Къуллугъдин ветеранриз, гьелбетда, кьетIендаказ сагърай лугьуз кIанзава. Квехъ виридахъ агалкьунар, мягькем сагъвал ва хизанра хушбахтлувал хьурай!» — кхьенва В.Путина вичин чарче.
***
УИС-дин 145 йис тамам хьунин сергьятра аваз, и йикъара Махачкъалада, 3-нумрадин силисдин изоляторда (СИЗО), жегьил къуллугъчийри присяга кьабулуниз талукьарнавай серенжемни кьиле фена. Ана идарадин кьиле авай ксари, гьакI къуллугъчийри иштиракна.
Мярекат СИЗО-дин начальник, къенепатан къуллугъдин полковник Варис Сулейманова, жегьил пешекаррихъ элкъвена, къуллугъдин везифаяр намуслудаказ кьилиз акъудун, къачунвай чирвилерикай кIвалахда тамамдаказ менфят къачун алхишна. Присягадин гафар жегьил къуллугъчияр патал абурун кIвалахда кьилин тереф жедайдахъ умудлувал къалурна.
— Уголовно-исполнительный къурулушдин къуллугъчидин пеше хкягъуналди, гьукумдин векилар яз, куь хивез куьне еке жавабдарвал къачузва. И пешеди квевай инсанвилин виниз тир ерияр истемишзава: жуьрэтлувал, намуслувал, гьахълувал, — къейдна ада.
Серенжемдин сергьятра аваз, УИС-диз къуллугъ кьиле тухуз атанвай жегьил 10 касди кIвалахдин рекьяй юлдашрин вилик присяга кьабулна, Россиядин Федерациядин Конституциядал ва законрал амал авунин, гьакIни хиве авай везифайрив намуслудаказ эгечIунин кьин гана.
Рагнеда Рамалданова
