Са шумуд югъ идалай вилик Россиядин ФСИН-дин (Федеральная служба исполнения наказаний) Дагъустан Республикада авай Управленидин «Инженервилинни техникадин рекьяй таъминарунин центр» (ЦИТО) ФКУ-дин (федеральное казенное учреждение) къуллугъчияр яшар тамам тахьанвай аялар патал Махачкъалада кардик квай реабилитациядин центрадиз мугьман хьана. Дагъустандин уголовно-исполнительный къурулушдин идарайра зегьмет чIугвазвайбурун коллективри яшайишдин идарайриз къаюмвал авун, абуруз куьмекар гун, мергьяматлувилин къанунралди ихьтин серенжемар кьиле тухун фадлай хъсан адетдиз элкъвенва. Уьмуьрдин четин шартIара гьатнавай аялриз куьмекар ва шадвал гун патал ихьтин гуьруьшар мукьвал-мукьвал кьиле тухузва.
И сеферда яшайишдинни реабилитациядин центрада авай гадайринни рушарин патав Дагъустанда авай УФСИН-дин ЦИТО ФКУ-дин къенепатан къуллугъдин майорар тир Шамил Насрудинов, Мегьамед Омаров ва къенепатан къуллугъдин старший прапорщик Эльбрус Гебеков атанвай.
Реабилитациядин центрадин коллективди ва аялри мугьманар хушвилелди кьабулна. Гадайрини рушари абуруз концертдин программа къалурна. Авур кьуьлери, тамамарай манийри ва кIелай шиирри мугьманрин гуьгьуьларни хкажна.
Концертдилай гуьгъуьниз мугьманри аялрихъ галаз суьгьбетарна, абуруз насигьатар гана, кIелунра, уьмуьрда агалкьунар хьун, мурадар кьилиз акъатун алхишна.
Эхирдай идарадин коллективди мугьманриз сагърай лагьана, мергьяматлувилин къанунралди кьилиз акъудзавай серенжемрикай аялар патал чIехи менфят хкатзавайди, абурун рикIер ачухарзавайди къейдна.
Рагнеда Рамалданова
