Алатай ислен юкъуз Каспийскда, Али Алиеван тIварунихъ галай Спортдин ва жегьилрин дворецда кьиле фейи Россиядин ММА-дин чIехи промоушенрикай сад тир Fight Nights Global 73 турнир еке къал-макъалдалди акьалтIна. Турнирдин кьилин бягьсина дагъустанви Агьмед Алиев ва Бразилиядай тир Диего Брандао “гуьруьшмиш” хьана. Кьвед лагьай раундда Алиева Д.Брандао партерда кьиливди яна, къадагъа авунвай приём ишлемишна. Чехиядай тир рефери Ян Поборника гъутарив ягъунай дагъустанви спортсмендин вилик пад атIун патал бягьс акъвазарна. И чIавуз бразилиявиди А.Алиеван гардан кIвачи яна, идалай кьулухъ ада рингдилай хъфин кьетIна. Бягьс кьиле физвай чкадилай адаз ракIар ачух тавурла, ада клеткадин сеткадилай хкадарна. И арада дагъустанви болельщикри, адал гъилик акатай затIар гадариз, адан тIварцIихъ чиркин гафар лугьуз эгечIна.
Залда са бубат къайда хтурла, Брандао рингдал хтана, амма бягьс давамаруникай кьил къакъудна. Судьяйри гъалибвал технический нокаутдалди Агьмед Алиеваз гунин къарар кьабулна.
Турнирдин сергьятра аваз кьиле фейи амай бягьсера бразилияви Фабио Мальдонадодиз дагъустанви Къурбан Омаров кумукьна. Дагъустанви Шамил Омарован ва бразилияви Русимар Пальяресан арада кьиле фейи бягьс Ш.Амирован хийирдиз хьана.
Рагнеда Рамалданова
