ГРЭППЛИНГ

Мукьвара Азербайжандин меркез Баку шегьерда “Бакудин Кубок” патал грэпплингдай акъажунар кьиле фена. Дуьньядин чемпионатдиз викIегь спортсменар хкядай и турнирда чи миллетдин 4 векилди чпин устадвал къалурна. Абуру кьудани медалар къазанмишна. ИкI, “No gi” разделдай 92 кг-дин заланвал авайбурун арада Аскер Эльдарова, 77 кг-дин заланвал авай спортсменрин арада Бахтияр Арзуманова къизилдин медалар ва дуьньядин чемпионатда иштиракдай путёвкаяр къазанмишна. Абурулай гъейри, чи кьве ватандашди: Мегьамед Аскарова (66 кг) — 2 ва  Эмин Мегьамедова (100 кг) 3-чкаяр кьуна.

РикIел хкин: грэпплингдай дуьньядин чемпионат октябрдиз Бакуда кьиле фида.

СПАРТАКИАДА

Алай йисан 9-сентябрдиз Махачкъалада, “Труд” стадиондал Да­гъустандин МФЦ-дин (многофункциональный центр) къуллугъчийрин арада Спартакиада кьиле фида. И серенжемдин макьсад Дагъустанда сагълам уьмуьр кечирмишун пропаганда авун,  гьакIни центрадин къуллугъчийрин арада физический гьазурлухвилин дережа хкажун я.

Спартакиададин программадик спортдин 11 жуьредай  акъажунар же­да. Абур РД-дин физический культурадин ва спортдин минис­тер­ст­водин, гьакIни Махачкъала ше­­гьердин администрациядин спортдин, туризмдин ва жегьилрин крарин рекьяй Комитетди тайинарнавай судьяйрин бригадади идара ийида.

КIвенкIвечи чкаяр кьур ксариз талукь дережайрин дипломар, кубокар ва къиметлу пишкешар гуда.

БОКС

Дагъустанви спортсмен Мегьамедрасул Межидова гьевескарвилин боксдин тарихда дуьньядин чемпионатда чIехи заланвал авай спортсменрин арада 3-сеферда къизилдин медаль къазанмишна. Финалдин акъажунра Азербайжандин командадин патай экъечIзавай М.Межидоваз къазахви Камшибек Кункабаев кумукьна.

Къейд авун лазим я хьи, М.Межидовал къведалди гьевескарвилин боксдай дуьньядин чемпионатра чIехи заланвал авай спортсменрикай Кубадай тир Теофило Стивенсон ва Роберто Баладо пуд сеферда пьедесталдал хкаж хьанай.

Рагнеда Рамалданова