2017-йисан мартдин вацра Да­гъустан Республикадин Кьил Рамазан Абдулатипован Указдин бинедаллаз Сулейман-Стальский райондин Г.Гьаса­нован тIварунихъ галай музыкальный школадин дирек­тордин заместитель  Гьажимет  ­Тагьирбеговаз “Дагъустан ­Рес­­публикадин культурадин лайихлу работник” лагьай гьуьрметдин тIвар гана. Шабагьни адав Дагъустан Республикадин культурадин министр Зарема Бутаевади (шикилда) шад гьалара вахкана.

И йикъара Гьажимет Тагьирбегов Сулейман-Стальский  рай­ондин кьил Нариман Абдулмуталибовани кьабулна, адаз гьуьрметдин тIвар мубаракна.

 

Машгьур инсанрин макан

Цмурар. ЧIехи ва баркаллу тарих авай и хуьряй Алибег Фатахов, Зияудин Эфендиев, Социализмдин Зегьметдин Игит Гьажимурад Темирханов ва машгьур маса ксар, гзаф кьадар алимар, Шайдаеврин, Эфендиеврин, Мегьамедоврин, Тагьирбеговрин… адлу тамам тухумар акъатна, абуру Лезгистан, и гъве­чIи хуьр яргъарани маш­гьур­на.

Польшадин литературадин машгьур векилрикай сад тир Аль­фред Конара лагьанай: ­“Бажарагъ — им валай гьич са­­дани­ чир тавунвай са кIва­лах ийиз ала­кьун я”. Бажарагъ, маса га­фа­­ралди лагьайтIа, Халикьди ин­сандиз гузвай пай я. И кели­ма­яр  Тагьирбеговрин  жуь­ре­­­ба-жуь­ре патарихъай пай ганвай ту­хумдин векилризни, кьилди къа­чур­тIа, Гьажиметазни талукь я.

Адан  рагьметлу дах Велимета яргъал йисара Цмуррин колхозда бригадирвиле, хуьре туьквенчи­виле, диде Саимата саки 45 йисуз майишатда кIва­лахна. Абурук халкьдин сеняткарвилин пешеярни квай.

Велимет ва Саимат Тагьирбеговри 11 аял хана, хвена, халкьдиз ва обществодиз бакара къведай инсанар яз чIехи авуна. Веледризни бажарагъдин патай пай ганва. ИкI, вахтсуз рагьметдиз фейи Хайирбег Азербайжан Республикадин лайихлу нефтяник, Султан Да­гъустан Рес­публикадин лайихлу рационализатор тир. Дагъустандин ра­диодин лезги передачайрин редакцияда  яргъал йисара  кьилин редакторвиле кIвалахай Да­­гъустан Республикадин культурадин ла­йих­лу работник, са шумуд ктабдин автор Ражаб Тагьирбегов республикада тIвар-ван авай журналистрикай сад я. Бажарагъдин патахъай амай веледарни “кесиб” туш.

“…Девлетар галайди”

Макъала гьазурдайла, зи яр-дуст Гьажимета вичин диде-бубадикай, абуру хуьр-кIвал, жемят патал авур хъсан кIвалах­рикай, веледриз гайи тербиядикай, насигьатрикай яргъалди суьгьбетарна. За кьатIана: адаз (гьакI амай веледризни) диде-буба чешне я, ам абурун рехъ давамаризни алахънава. Ри­кIел шаир Рамазан Каитова кхьей цIарар къвезва: “Вичин дидед, бубад къадир авайди, лугьуда хьи, я девлетар галайди”.

Гьажимет Тагьирбегов 1960-йисан 16-декабрдиз Цмуррин хуьре дидедиз хьана. Гьеле хуьруьн 8  йисан школада кIелзавай йисара, чIагъанчи яз, жегьилди клубдин художественный самодеятельностдин кIвалахда активвилелди иштиракиз хьана. Районда тухвай килигунрани Гьажимета вичин алакьунар са шумудра къалурна.

Неинки са чIагъан, гьакI музыкадин маса алатарни ягъиз чизвай Гь.Тагьирбегов, муьжуьд йисан школа акьалтIарна, 1977-йисуз Махачкъаладин Г.Гьасанован тIварунихъ галай музыкальный училищедик экечIна. “Оркестрдин руководитель ва аялрин му­зыкальный школадин муаллим” пешекарвал къачуналди училище акьалтIарай 1981-йисуз Гь. Тагьирбегова вичин зегьметдин рехъ Сулейман-Стальский райондин музыкальный школада муаллимвиле  кIвала­ху­нилай башламишна.

Армиядин жергейра къуллугъна хтайдалай гуьгъуьниз (1983-йисалай) Гьажимет Велиметовича вичин рикI алай пешедай кIвалахун давамарзава.

— Халкьдин руьгьдин культурада музыкади дибдин чкайрикай сад кьазва. “Сесерикай хранвай” художественный суьретрай чаз яшайишдин, къилихрин, адетрин, эрзиман мурадрин, жуьреба-жуьре рангарин гьакъикъат, чи такабурлу дагълар, цуьк ахъайнавай яйлахар, дереяр, гьамга хьтин булахар, гурлу вацIар рахадай ван къвезва, музыкади инсандин къанажагъда, адан рикIе вичин гуьзелвилин гьисс уя­харзава, — лугьуз­ва Гьажимет Та­гьир­бегова.

Са хизанда хьиз…

Гь.Тагьирбегова 35 йисалай виниз музыкальный школада — яратмишунрин, дуствилин коллективда — кIвалахдай мумкинвал хьунал дамахзава. “Чун са хизан хьиз я”, — лугьузва ада.

Коллективда Гьажимет Велиметовичаз лайихлу гьуьрмет ава.

1996-йисалай ада старший преподавателвиле, 2001-йисалай директордин заместителвиле кIва­лах­зава, 2000-йисалай инихъ райондин культурадин управленидин профкомдин председателдин за­мес­тителвилин везифаярни намуслудаказ кьилиз акъудзава. Имни Гь.Тагьирбеговаз кIвалахдин юлдашри къимет гунин ва гьуьрмет авунин лишан я.

— Гьажимет Велиметови­чакай рахадайла, Инсан, Пешекар, Муаллим гафар чIехи гьарфарилай кхьиниз лайихлу я, — лу­гьузва винидихъ тIвар кьунвай музыкальный школадин ­ди­­ректор, РД-дин культурадин ла­йихлу работник Къазибег Къу­рбанова.

Гь.Тагьирбегован намуслу зегьмет РФ-дин культурадин министерстводин ва Россиядин культурадин работникрин профсоюздин комитетдин (2009-йис), Дагъустан Республикадин Гьукуматдин (2016-йис) гьуьрметдин грамотаяр гуналдини къейднава.

Халудал атай хтул

Бажарагълу писатель Зияудин Эфендиеваз вичикай тарифдин гафар рахаз кIандачир лугьуда. Гьажимет З.Эфендиеван вахан гада, хайи хтул я. Гьажиметни халудал атай хтул я, вичин лайихлувилер, алакьунарни ада вичин коллективдихъ галаз алакъалу ийизва.

Ада вич бахтлу инсан яз гьисабзава. ГьикI хьи, инсан бахтлу ийизвай чарасуз шартIар — сагъламвал, рикI алай пешедин иеси хьун ва туькIвей хизан — Гь.Та­гьир­беговахъ ава.

Гьажиметани адан уьмуьрдин юлдаш, гзаф мегьрибан ­дишегьли тир Гуьлуьмагъади пуд велед — кьве гадани са руш чIехи авуна. Халу Зияудинан тIвар эхцигнавай чIехи гада дахдин гелеваз фена, ам музы­кальный школада муаллим я. Руш Анжелади Тюменский областдин Сургут шегьерда сбербанкдин управляющийвиле, га­да Хайирбега Махачкъалада ФСИН-дин органра кIвалахзава, ам къенепатан къуллугъдин старший лейтенант я.

Хазран Кьасумов,
РФ-дин журналистрин Союздин член