Махачкъалада, Ленинан (гила Р.Гьамзатован) куьчедай Редукторный поселокдихъ къведайла, ракьун рекьелай элячIун патал эцигнавай цIийи муькъуьн 15 йис тамам жезва. А муьгъ 2002-йисуз, меркездин 145 йис тамам жезвай йикъара шадвилин гьалара ачухнай.
РикIел алама: а югъ мишекъат, цавай мур къвазвай, къайиди тир. Амма шегьерэгьлийри а мекьивал гьиссзавачир. ГьикI хьи, ихьтин зурба имарат ишлемишиз вахкуни вирибурук, иллаки машинар гвайбурук, эцигунардайбурук еке шадвал кутунвай.
А муьгъ, гекъигайла, лап куьруь вахтунда эцигнай, вучиз лагьайтIа куьгьне хьанвай муьгъ чукIурайдалай кьулухъ ракьун рекьелай элячIун гьам машинриз, гьам инсанризни четин хьанвай. Поезддин рехъ агализ хьун мумкин тушир, шегьеррин (Махачкъала-Каспийск) рехъни датIана ачухна кIанзавай.
Гьавиляй неинки республикадин, сифте нубатда, а чIаван чи меркездин администрациядин, рекьерин ва муькъверин карханайрин коллективри чпин хивез гьакьван еке мажбурнама къачунвай. Эцигунрин са шумуд карханади чпин къуватар саднавай. Абурук “Яру-Дагъ” фирма, “Дагавтодордин” рекьер, муькъвер эцигунин рекьяй махсус управлениярни квай. Эцигунрин кIвалахар мэрияди вичин гуьзчивилик кутунвай. Кьилени чи лезги хва, шегьердин а чIаван администрациядин кьилин заместитель, РФ-дин лайихлу эцигунардайди Альдер Абдуллаевич Мирзеханов авай. А чIаван репортажрай аквазвайвал, а касди тамам варцар инал устIаррихъ ва инженеррихъни конструкторрихъ галаз акъудзавай. Неинки муьгъ вахтунда вахкун, ам лап виниз тир ери авайдини хьун лазим тир. Муькъвер гьар юкъуз эцигиз-чукIуриз жедайди туш эхир!..
ИкI, вичин гьяркьуьвилел 21 метр, яргъивилел 350 метр алай ракьунни бетондин кьакьан тагъарин гуьрчег имарат, эцигиз йисни тахьанмаз, ишлемишиз вахканай!
Анай сифте фейибурук чи газетдин жавабдар секретарь Даир Бейбалаеван хцин мехъерин сварагни квай.
Ам, дугъриданни, чи устIарринни фялейрин, инженерринни конструкторрин, техникрин агалкьун тир. Зегьметдин гьунар!..
За а чIавуз, и агалкьун тебрикун яз, шиир кхьенай. Ам а чIавуз чапдай акъудиз агакьначир. Гила ам квез теклифзава.
Мерд али
