Республикадин рекьерин къуллугъди Сулейман-Стальский райондин “Кьасумхуьр — Уллугъетягъ” шегьредилай Вини Хъартасрив агакьзавай рекьин участок цIийикIа туькIуьр хъийизва, хабар гузва РД-дин транспортдин ва рекьерин майишатдин министерстводин пресс-къуллугъди.
И рекьи Вини Хъартасрин хуьр муниципалитетдин маса хуьрерихъ галаз алакъалу ийизва. Ада гьакIни Агъа Хъартасрин хуьряй “Кьасумхуьр — Кьурагь” шегьредал Вини Хъартасрин хуьряй физвай куьруь рекьяй агакьарун таъминарзава.
“Бязи чкайра рехъ дагъдин муракаб шартIар — хкаж жедай ва агъуз эвичIдай гзаф чкаяр ва къекъуьнар авай мулкунилай физва. Кьабулнавай къараррин нетижада цIийикIа туькIуьр хъийизвай рекьин санлай къачур яргъивал авайдалай куьруь ва 5,46 километрдиз барабар хьанва. Гьар юкъуз и участокда 9-11 машинди кIвалахзава”, — къейдзава чешмеди.
Рехъ цIийикIа туькIуьр хъувунин кIвалахар алай йисан ноябрдалди куьтягьун лазим я. И кIвалахрин икьрардин къимет 33 миллионни 107 агъзур манатдиз барабар я.
Чи мухбир
