Дагъустанда “Куллар-Ярукьвалар” шегьре рехъ туькIуьрунин кIвалахарни давам жезва. И рехъ Дербент, Сулейман-Стальский ва Мегьарамдхуьруьн районрин мулкунилай физва.
Къейд ийин, и участокда кIвалахар гьеле 2015-йисуз государстводин “Развитие территориальных автомобильных дорог республиканского, межмуниципального и местного значения Республики Дагестан” программадин сергьятра аваз башламишнай. ЦIийикIа туькIуьрзавай рекьин яргъивал 3,8 километрдиз барабар я. Рехъ туькIуьрдайла, ина кьве муьгъни эцигнава. Сад лагьайди (яргъивал — 17,9 метр) Самур-Дербент къаналдилай, кьвед лагьайдини (81,4 метр) Гуьлгеричай вацIалай.
“Куллар — Ярукьвалар” шегьре рехъ туькIуьруналди, Самур вацIун кьиблепата авай хуьрер Дагъустандин кьиблепатан паюнихъ галаз алакъалу ийидай маршрут жезва. И шегьреди Махачкъала ва Дербент шегьеррай и хуьрериз, гьакIни Яламадин патав гвай таможнядин постунал фидай рехъ 20 километрдин куьруь ийизва. И рехъ ишлемишиз алай йисан ноябрдиз вахкуда.
И рекьихъ хуьруьн майишатдин хел ва туризм виликди тухунин, гьакIни культурадин алакъаяр мягькемарунин жигьетдай еке важиблувал ава, гьикI лагьайтIа ада тIебиатдин надир памятник, Россиядин мулкунал алай тек сад тир субтропикрин сармашухдин тамуз фидай рехъ са кьадар куьруь ийизва.
«Лезги газет»
