Чпин тIварар дуьньяда машгьур хьанвай лезги алимрикай сад технический илимрин доктор, МТУ-дин профессор  Абдулкъадиров  Мегьамед  Абдуразакьович  я.

Ам 1954-йисуз Махачкъалада Вини Ярагъдилай тир къуллугъчи Абдуразакьан хизанда дидедиз хьана. Ада шегьердин 13-нумрадин мектеб ва 1977-йисуз Москвада Бауманан тIварунихъ галай кьилин училище агалкьунралди куьтягьна. Хъсан чирвилерни алакьунар авай жегьил А-7453 нумрадин карханадиз кIвалахал ракъурна. Ана ам са куь­руь вахтунда кьилин оптиквилин къуллугъдал элячI­на. 2003-йи­суз “Астрономический ва космический оптика” комплексдин директорвиле тайинарна.

2008-йисуз Абдулкъадирова “Оптические и оптикоэлектронные приборы и комплексы” темадай технический илимрин кандидатвилин диссертация хвена.

Алимдилай технический ва тешкиллувилин четин месэлаяр агалкьунралди гьялдай, крар виликди тухудай рекьер жагъуриз алакьна. Оптический затIар арадал гъунин карда ам дуьньядин дережа­да машгьур хьанва. Адан регьбервилик квай коллективди 2 метрдилай 10 метрдал кьван диаметр авай дуьньяда виридалайни муракаб гуьзгуьяр арадал гъана. Абурукай алай вахтунда Бельгияда, Великобританияда, Китайда, ЮАР-да ва США-да гегьеншдиз менфят къачузва.

Мегьамед Абдулкъадиров илимдин рекье бегьерлувилелди кIвалахзавай алим я. Адан къелемдикай 100-лайни гзаф илимдин кIвалахар хкатна­ва. Абурукай гзафбур США-да ва Европадин уьл­квейра чапнава. Алим 21 патентдин сагьиб, Москвадин технический университетдин “Оптикадин системаяр ва технологияр” кафедрадин заведующий я.

Машгьур алим гзаф кьадар шабагьриз, тIва­ра­риз­ лайихлу хьанва. РФ-дин лайихлу машино­строи­тель тир алим международный “Контенант” акаде­миядин президиумдин ва са жерге маса обще­ст­вен­ный академийрин член я.

Куругъли Ферзалиев