ТIебиатда малум тир ажайиб тарарикай сад драцена я. Ам гьамиша къацу яз амукьзава. Драценадиз дракондин тарни лугьузва. Гуьрчег, адетдинди тушир адахъ галаз алакъалу риваятарни малум я. Ам винел патан акунрай кактусдиз ухшар я. “Дракондин” тандай кьацI акъудайтIа, анай яру рангунин миже авахьда. Дегь заманайрилай ам халкьдин медицинада ишлемишзавай. Гила  лагьайтIа, тарцин мижедикай лак ва ширер патал менфят къачузва.

Яваш-яваш экъечIдай, къвердавай хилер артух жедай и тарцин кьакьанвал 20 метрдив агакьда. Бязи чешмейра къейдзавайвал, ам са шумуд агъзур йисуз яшамиш хьун мумкин я. Виридалайни еке “дракондин” тарцин яргъивал 21 метрдив агакьна, адан яш  6 агъзур йис кьван яз тестикьарна. Ам 1868-йисуз къати гару ярхарна.

Драцена Африкадин чими чкайра, Кьибле-Шаркь патан Азиядин островра дуьшуьш жеда.

Гьазурайди — Куругъли Ферзалиев