Хив райондин КьванцIилрин хуьряй машгьур инсанар — илимрин кандидатарни докторар, офицерар, спортсменар… гзаф акъатна. Абурун арадай яз, сифтегьан офицер Агъабег Къафланован (30-далай виниз йисара ада хуьруьн юкьван мектебда военрук яз кIвалахна, аялар военный училищейриз гьахьун патал гьазурна), ина кIелай Нариман Къазимегьамедован (алай вахтунда генерал-майор, РФ-дин МЧС-дин Дагъустанда авай Кьилин Управленидин регьбер) ва гзаф масабурун тIварар кьаз жеда. КьванцIилай акъатай ксар исятда неинки Дагъустандин, гьакIни Россиядин жуьреба-жуьре шегьерра, гьа гьисабдай яз Москвада, Санкт-Петербургда, Екатеринбургда, Ростовда, Красноярскда, Иркутскда, Нижневартовскда, Сургутда, Норильскда, Рязанда, Саратовдин ва Ставрополдин крайра, Къазахстандин Павлодар ва Актау шегьерра ва масанрани гзаф ава.
Жуван миллетдин векилрикай хъсан гафар ван хьайила, пара кьадар шад жеда. Иллаки жегьилри кIелунра, спортда хъсан нетижаяр къалуруни чак лувар кутазва. Нижневартовскдай (ХМАО-Югра) чав хъсан хабарар мукьвал-мукьвал агакьзава. ИкI, са тIимил вахт идалай вилик ана яшамиш жезвай чи ватанэгьли, дзюдодай ва самбодай спортдин мастер, Кьиблепатан Кореядин Чхунджу шегьерда кьиле фейи чIехи, гьакIни международный хейлин турниррин гъалибчи Шамиль Зульфикъарова самбодай Россиядин чемпионвилин тIвар къазанмишна. Адан ери-бине КьванцIилрин хуьряй я. Гаф кватай чкадал лугьун хьи, и хуьряй тир 60-далай виниз хизанар — Нижневартовксда ва 15-дав агакьна хизанарни Сургутда яшамиш жезва. Арада авай са акьван тIимил тушир мензилдизни килиг тавуна, абур мел-мехъеррик, межлисрик аквазва.
Нубатдин сеферда чун Нижневартовксда Шамиль Зульфикъарован мехъерик кIватI хьана. Адан свас Къазахстанда чIехи хьанвай чи лезги бала я. ЦIийи хизандиз Аллагьди бахтар гурай! За гьамиша лугьузва: чи хьтин халкь авайди туш дуьньяда. Акьуллу, регьимлу, игит, вафалу. КIанзавайди, акьалтзавай несилриз дуьз рехъ къалурун — абуруз хъсан тербия ва чирвилер гун я. Амай хъсан вири ерияр чи миллетдин ивидик ква.
Межлисда гзаф мугьманар, гьа гьисабдай яз машгьур спортсменарни, маса миллетрин векиларни авай. Ана Шамилан тренер Виктор Валерьевич Воробьёвани иштиракна. Аферин ва баркалла адаз! ХМАО-Юграда Шамилаз вичин устадвал къалурдай вири мумкинвилер яратмишна а касди. Чахъ гзаф жуванбурни ава, дуьньядикай хабар авачирбур, са кIвалах хьайила, “моя хата с края” лугьудайбур. АкI виже къведач, пака вазни куьмек кIан жеда.
Са кьве гаф мекъерик иштиракай “Кавказ” ВИА-дикайни лугьуз кIанзава. И дестеди Покачи шегьерда Яран суварин межлисар пулсуз са шумуд сеферда къалурна. ХМАО-да авай амай дестейрини Яран суварик пулсуздаказ иштиракзава.
“Кавказ” ВИА-дин манидар Рустам Рамазанов Кьурагь райондин Хпежай, ямахаяр язавай кьве стха — Магьмуд ва Умар КIиридай я. Мекъерик Дагъустан Республикадин лайихлу артист Мегьамед Аликберовни квай. Вири музыкантри зегьмет чIугуна, межлис гурлуди хьана. Аферин, баркалла абуруз!
Мехъерик чи стха Лазерани вичин хизанни галаз гзаф активнидаказ иштиракна. Адан ери-бинени КьванцIилрин хуьряй я. Чи балайри Тюмендин медакадемияда санал кIелна. Медакадемияда чун сад-садаз акурла, рикIиз пара хуш, чун чахъ галаз мукьувай таниш хьана. Гаф кватай чкадал лугьун, чи кьведан балайрини вири “вадар” аваз кIелна. Исятда Ростовда ва Дагъустанда кIвалахзава.
Зун гзаф шегьерриз физвай кас, зи кIвалах гьахьтинди я. Заз эхиримжи вахтара аквазва, чи жегьилар жавабдар кIвалахрал тIимил тайинарзава. “КIела, кIела, мадни кIела!” гьикьван лагьайтIани, хъсандиз кIелна, са лайихлу кеспидал акъваздай мумкинвал авачир дуьшуьшарни, гьайиф хьи, гьалтзава. Пис замана атанва. Заз аквазвайвал, чи миллет такIан я. Вун гьикьван викIегь ва кар алакьдайди ятIани, хуш туш. Эгер чи халкьдин арада садвал тахьайтIа, чи эхир хъсанди жедач. За гьар са мехъерик ва межлисдик ФЛНКА-дин президент Ариф Пашаевич Керимован патайни мубаракзава. Халкь сад хьуниз эвер гузва. Закай лагьайтIа, заз кьилди жув патал кIандай са затIни авач, гьуьрметлу зи ватанэгьлияр! Заз Аллагьди вири ганва. Амма заз зи Лезги халкь вини дережайра хьана кIанзава. Шадвилер, хъсанвилер, бахтлувилер чи виридан балайриз акурай, я Аллагь! Къуй дуьнья ислягь хьурай!
Жалалудин Абдуразакьов
