Чеперин хуьр. Ам гуьзел, гуьлчимен дагъларин гьайкал хьиз аквада. Хайи чилин — юрдарин алемдиз саламатвал, умудлувал, инанмишвал гузвай къуват, гьайбат хьиз. Чепер. Пак Эренлардин этег кьунвай, даим Шалбуздин нур пелевай хуьр. Дагъдин гуьнейра техилар цаз, недай ризкьи битмишарзавай, лежберрин, яйлахра мал-хеб хуьз, ягълу-къафун бул гьасилзавай малдаррин хуьр.
Гьа ихьтин дагълара, яйлахра чпин тIварар тунвай баркаллу инсанрикай сад тир Сиябов Серкер Агъакеримовичакай я чи суьгьбет. Гьар гьиниз акъатайтIани, гьина динж хьайитIани, хайи хуьр, адан чилин накьв, мулкар рикIелай алатдач. Векь ядайла мелер тешкилай, уьруьшра — малар, яйлахра лапагар хвейи и чилин накьвар гьикьван мублагь я?! Ина цуьквер, векьер, къушар, гьайванар гьикьван иер аквада. И кIанивал чIаларалди-гафаралди ачухун четин я. Гьа ихьтин яйлахрикай сад Сияб яйлахни я.
Рагьметлу Серкер буба 1906-йисуз Чеперин хуьре кесиб лежбердин хизанда дидедиз хьана. Гьеле гъвечIи аял яз ам етим хьана, имидин хизандиз акъатна. 13 йисан яшда авай аял яз ада, колхоздин майишатда жуьреба-жуьре кIвалахар ийиз, зегьметдин рехъ башламишна. 1932-йисуз ада хайи хуьруьн школада 4 классдин чирвилер къачуна. А йисара Чеперин хуьре ва Ахцегь райондин маса хуьрерани шегьре рекьер туькIуьриз гатIуннавай. 1934-1937-йисара ада хуьруьн почтальонвиле кIвалахна.
Гуьгъуьнлай ам, хъсан устIар яз, ЦIехуьлрин муьгъ эцигиз ракъурна. Гьар гьина кIвалахнатIани, кар алакьдай пешекарди мажибдилай артух премиярни къачуна. 1941-1942-йисара Дербент шегьерда, Бабаюрт районда, Дагъустандин Огнида къаналар эгъуьниз зегьмет чIугуна. Гьа вахтунда бригададиз “сиябовцы” лагьай тIвар ганвай.
И кIвалахрай адаз 1943-йисуз ДАССР-дин Верховный Советдин Гьуьрметдин грамота ганай. Дяведин къизгъин йисара ада далу пата, Самур станциядал дяведиз ракъурун патал шалманар гьазурзавай заводда кIвалахна. 1941-1945-йисара чIугур зегьметдай ам “Гьакъисагъ зегьметдай” медалдиз лайихлу хьана.
1946-йисуз Серкер буба ВКП(б)-дин членвилиз кьабулна. Гьа йисалай башламишна ада К.Марксан колхоздин ревизиядин комиссиядин председателвиле кIвалахна. Гьина кIвалахнатIани, ада вичиз, хизандиз лайихлу тIвар къазанмишна. Серкер буба 1984-йисуз рагьметдиз фена, ам Чеперин хуьре кучукнава.
Гьар сеферда, жуьреба-жуьре вакъиаяр хьайила, хуьруьн жемятди гьуьрметлу инсанар рикIел хкизва. Абурун арада и макъаладин кьилин игитни ава. Къени чна адаз “рагьмет хьурай ваз, Серкер буба” лугьузва. Адан къамат чи рикIера гьамишалугъ яз амукьда.
Алирза Азизханов,
Дербент шегьер
