2021-йисуз Дагъустандин промышленный производстводин индекс 109,5 процентдиз барабар хьана. Идакай РД-дин Гьукуматдин Председателдин сад лагьай заместитель Батыр Эмеева хабар гузва.
“Ихьтин нетижайрив федеральный къурулушрихъ, гьа жергедай яз Россиядин оборонадин министерстводихъ ва ОПК-дин карханайрихъ галаз санал тухвай кIвалахдин нетижада агакьнава”, — гьисабзава ада. Къейдзавайвал, оборонадин заказдин кьадар алатай йисуз 7,3 млрд манатдив агакьдалди хкаж хьана, им лагьайтIа, 2020-йисуз хьайи кьадардилай 40 процентдин гзаф я. Зегьметдин бегьерлувал виридалайни гзаф “Концерн КЭМЗ” ва “Завод Дагдизель” ОАО карханайри хкажнава.
Идалайни гъейри, алатай йисуз республикада кIвачин къапарин кьве фабрика ва затIар кIевдай материалрин (упаковка) кархана ачухна. Нетижада кIвалахдин цIийи 185 чка арадал гъана. И проектар уьмуьрдиз кечирмишун патал 580 млн манат инвестицияр чара авунай.
“Ачухзавай фабрикайри тестикьарзавайвал, Дагъустанда гьазурзавай кIвачин къапарихъ гьам республикадин къенепата, гьамни адалай къерехда игьтияж ава. Гьаниз килигна, алай йисуз кIвачин къапарин мад кьуд фабрика ачухун гуьзлемишзава”, — малумарна Б.Эмеева.
Ада гьакIни къейд авурвал, “Салаватстекло Каспий” ООО-да 2021-йисуз производстводин кьадар тахминан 4 млрд манатдиз барабар хьана. Завод Россиядин мулкунал кардик квай алай аямдин виридалайни эхиримжи технологияр ишлемишзавай карханайрин арада кIвенкIвечи я лагьайтIа жеда.
«Лезги газет»
