Дяведин махсус серенжемдин иштиракчийрин, залан хирерикди набутрин жергейриз акъатнавай кьегьалрин гележегдин къайгъударвал авун патал уьлкведа ва чи республикадани махсус фондари, центрайри, программайри («Игитрин вахт», «Дагъларин гьунар») кIвалахзава.
Мисал яз, «Дагъларин гьунар» программа (502 сят) государство идара ийидай кьилин школадин управлениди кьиле тухузва. КIелунин план кьуд хилекай ибарат я: государстводин сиясат ва государство идара авунин къурулуш; экономика ва финансар; региондин ва муниципалитетдин къурулушар идара авун; идара ийидай алай аямдин технологияр. И программади курсара кIелдайбуруз чпин алакьунар, тежриба менфятлудаказ ишлемишдай шартIар ва мумкинвилер теклифзава.
Гьа и программадилай чешне къачуна, Дагъустандин госпедуниверситетдин ректор Нариман Асварова ва дяведин махсус серенжемда важиблу везифаяр кьилиз акъудзавай «Каспий» батальондин командир, «Жуьрэтлувиляй» ордендин сагьиб Рагьим Нурмуханова СВО-дин ветеранар школайра тарсар гунал желб авун теклифзава.
Абурун гафаралди, дяведин махсус серенжемдай хтанвай аскеррихъ школайра «Ватандин тарих», «Ватандин хатасузвал хуьнин дибар», «Обществознание» тарсар гунин жигьетдай кьетIен тежриба ава. Акьалтзавай несилдиз хийир хкатдайвал, адакай менфятни къачун герек я.
Нариман Асварова къейдзавайвал, къенин йикъан школадихъ неинки образование къачунвай пешекар муаллимрин, гьакI жаванриз ватанпересвилин тербия гуз алакьдай, гражданвилин жавабдарвилин жигьетдай абурун къанажагъ гегьеншардай, тарихдин вакъиайриз гьахълу къиметар гуз жедай алакьунар авай ксарин гьакъиндайни игьтияж ава.
«СВО-дин ветеранар тарихдин чан алай чешмеяр я. Абуруз Ватан хуьн, аскервилин кьинез вафалу хьун, уьмуьрда гьалтзавай къурхулувилериз викIегьвилелди жаваб гун гьихьтин крар ва ерияр ятIа, хъсандиз чизва. Ихьтин инсанрилай аялриз ватанпересвилин, уьлкве кIан хьунин, ам патал зегьмет чIугунин тербия ва тарсар гуз жеда. Абуру жаванриз чпин тежриба чирда»,- лугьузва вуздин ректорди.
Рагьим Нурмуханова къейдзавайвал, фронтдин стхавал, дуствал чир хьанвай, акьалтIай четинвилер, хаталувилер акунвай, коллективный западдин къурхуйрин метлеб вуч ятIа кьатIанвай, дяведин махсус серенжемдай акъатнавай аскеррилай жегьилриз къенин йикъан гьакъикъатдикай дуьм-дуьз малуматар гуз алакьда.
«Чи аскерар Ватандин ЧIехи дяведин игитрин несилар я. Чна къе, гьа вахтунда чи викIегь бубайри хьиз, фашистрихъ галаз женг чIугвазва. Чаз цIийи фашистрин, Украинадин миллетчийрин инсафсузвилер, абуру, урусар я лугьуз, ислягь инсанриз ийизвай зулумар аквазва ва чаз чна вуч патал дяве ийизватIа чизва. И гьакъикъатдин иесийривай, шагьидривай жегьилрихъ галазни регьятдиз, гьахълудаказ, абур инанмишардай саягъда рахаз жеда. Идахъ галаз сад хьиз, СВО-дин аскерри, ветеранри профилактикадин кIвалахни вилик тухуда. Абурун кIвалахди жаванар ва жегьилар неонацистрин, чи адетрихъ, къанунрихъ галаз кьан тийизвай идеологиядин таъсирдик акатунин вилик падни кьада»,- лагьана Р. Нурмуханова.
Абад Азадов
