Ширинов Рамалдан Ширинович 1900-йисуз Куьре округдин Агъа АрхитIрин хуьре урта лежбердин хизанда дидедиз хьана.
ЧIехи Ватан дяведин хаталувилик акатайла, 1941-йисан сентябрдиз, Ширинов Рамалдан Хив райондин РВК-дай фронтдиз фена. Вичихъ хъсан алакьунар авай яру аскер 440-нумрадин лишанчийрин полкуниз акъатна.
Гитлеран фашистар, советрин халкьариз еке инсафсузвилер ийиз, шегьерар, хуьрер чукIуриз, Москвадиз мукьва жезвай. Абурун планрик тади гьалда Повольже, Кавказ къачун ва ахпа Бакудиз фин квай. Ширинов Рамалдана, Дагъустандай вичихъ галаз санал къуллугъзавай аскеррин жергеда аваз, 1943-йисан майдалди къати женгера душмандиз ягъунар кьуна. Лишанчийрин 440-полк дяведин майданда вилик жергеда авай. Яру Армиядин аскерри Кавказ, Поволжье душманрикай азадна, агъзурралди фашистар тергна, амайбур кьулухъди катуниз мажбурна.
1943-йисан 11-майдиз фашистрин авиацияди Ростов шегьердал ва чи кьушунрал гадарай бомбайрик Ширинов Рамалданни акатна. Адан чапла кIвачел залан хирер хьана. Госпиталда са гьал сагъ хъхьайла, дяведин инвалид яз, хайи хуьруьз хтана.
Набутрин жергеда хьанатIани, ачух хци рикI авай, милаим хесетрин дагъви кIвалахдивай къерех хьана акъвазнач. Ада хайи хуьруьн Тельманан тIварунихъ галай колхозда, гуьгъуьнлай «Сафаралиевский» совхозда зегьмет чIугуна, Ватандин къудратлувал хкажуник вичин лайихлу пай кутуна.
Хуьре, районда жезвай гьар са мярекатда иштиракиз, ада акьалтзавай несилдиз ватанпересвилин тербия гуз хьана. Ширинов Рамалданан дяведин йисарин гьунарар Яру Армиядин командованиди ва Советрин Гьукуматди Ватандин дяведин I дережадин ордендалди, Жукован, «Германиядал гъалиб хьунай» ва юбилейрин вири медалралди къейдна.
Рамазан Велибегов
